Super Amara BATeko beteranoen erakustaldia
Asteburuan jokatutako Euskadiko Master Txapelketan zazpi urre irabazi dituzte, eta sasoiko daudela erakutsi dute.
Susana Ruiz, Euskadiko Master Txapelketako 400 metroko proban.BAT Gaztetxoetatik hasita beteranoetara denboraldi bikaina ari dira egiten asteburuz asteburu Super Amara BATeko kirolariek. Asteburu honetan, hainbat bidasoar Euskadiko Master Txapelketan izan dira, sasoian daudela erakutsita. Orotara, zazpi urre, bi zilar eta brontzeko bi domina eskuratu zituzten. Baita, bestelako marka aipagarriak ere.
Miguel Arburua jaurtiketako lau diziplinatan (mailu astunean, xabalinan, mailu jaurtiketan eta pisu jaurtiketan) nagusitasunez gailendu zen, M55 kategorian. M35 kategiorian, Jon Unzuetak bi domin eskuratu zituen, 1.500 metrotan, lehenengoa izan zen; eta 800 metrotan, bigarren. Abiadura probetan ere maila oneko atletak izan ziren. M50an, Susana Ruizek aginte makila izan zuen 400 metrotan, eta 800 metrotan, berriz, Raul Sanzek ezin izan zuen ohorezko postuak lortu, laugarren izan baitzen. M4Oan, Izarraitz Arbelaitzek urrezko bina domina eskuratu zituen, 100 eta 200 metrotan. M60an, Jose Mari Zabalak borrokatutako brontzezko dominak eskuratu zituen, 100 eta 200 metrotan.
Beteranoez gain, taldeko gazteenen txanda ere izan da asteburu honetan. Hauek ere beteranoen antzera, markak egin dituzte Gipuzkoako eskolarteko txapelketan. Emakumezkoak lehenengoak izan dira, 86 puntu eskuratuta; eta gizonezkoak, aldiz, txapeldunordeak. Harrobiak lan izugarria egiten ari dela azpimarratu dute, gizonezkoen zein emakumezkoen hiru taldeak lurraldeko onenen artean sailkatzea lortu baitzuten.
