Real Unioneko beteranoek sasoian jarraitzen dutela erakutsi dute
Donosti Master Cup txapelketan, 55 urtetik gorakoak bigarrenak izan dira bigarren urtez jarraian finalean galdu ostean.
Donosti Cup futbolari gazteen udako hitzordurik nagusia bada ere, beteranoek ere badute eurena. Asteburu honetan, maiatzak 30 eta 31, Real Unioneko beteranoak Donosti Master Cupean izan dira beste urte batez, eta parte hartu duten bi taldeek emaitza aipagarriak lortu dituzte. 55 urtetik gorako kategorian, bigarrenak izan dira irundarrak. Finalera heltzea lortu zuten, baina ezin izan zuten San Agustin talde madrildarra garaitu. Aurreko edizioetako finala errepikatu zen, eta San Agustin taldea irundarreren mamu bilakatu dela ziurtatu dute.
Lehenengo fase bikaina egin ostean, finalerdietan Ithaca talde estatubatuarraren aurka jokatu zuten, eta gutxigatik finalerako txartela lortu zuten. Aurtengo edizioa berretsi du urteotan egindako lana, eta taldea ziurra da esperotako txapela noizbait helduko dela.
35 urtetik gorako Roca Real Union taldea, berriz, kontsolazio txapelketan garaileak izan ziren. Sanpedrotarraren aurka galdu ostean, bigarren faserako txartela ez zuten lortu irundarrek, eta kontsolazio fasea jokatu behar izan zuten. Finalerdietan, nagusitasunez Sporting Club Cadaujac taldea mendean hartu zuen eta finalean, FC Le Bon Jouet. 35 urtetik gorako txapelketako garaileak sanpedrotarrak izan ziren.
Iñaki de Mujikaren omenezko txapelketa
Donosti Master Cupen erakutsitako irudia, datorren larunbatean, hilak 13, antolatuko duten Iñaki de Mujikaren omenezko txapelketan mantentzen ahaleginduko dira. Irun Hiria Beteranoen Txapelketako bederatzigarren edizioa aurtengoa, eta urteotan egin bezala, xede solidarioa izango du aurten ere. Txapelketan zehar, euro bateko tiketak salduko dituzte.
Real Unioneko beteranoek Behobiako eta Castroko (Kantabria) taldeen aurka jokatuko dute aurtengo edizioan. 10:45ean hasita, 13:00etara bitarte hiru partida jokatuko dituzte Stadium Galen. 10:45ean, Real Union eta Behobiaren arteko partidak txapelketari hasiera emango dio. 11:30ean, Behobia eta Castroren arteko partida jokatuko dute; eta 12:15ean, Real Union eta Castroren artekoa. 13:00etan txapelketaren sari banaketa egingo dute aurtengoari amaiera emateko.
