Oscar olinpikoak Hondarribian izan dira
Olinpiaden Korto Lehiaketa egin dute, lehenengo aldiz. Ostiralean Itsas Etxean elkartu ziren, dotore jantziz eta haien film laburrak aurkeztuz.
Hondarribiko kaleak jantzi dotorez bete ziren ostiralean. Askoren ustez, ezkontza bateko gonbidatuak ziren, baina ez, Itsas Etxea Auditoriumean elkartu ziren dotore jantzitako gazte guztiak. Hondarribiko Olinpiaden lehenengo Korto Lehiaketa ospatu zuten ostiralean, eta horregatik, Oscars sariei parodia moduko bat eginez, alfonbra gorria luzatu zuten Itsas Etxean. Parte hartu zuen talde bakoitzak bere film laburra aurkeztu zuen ostiraleko galan, eta ondoren, sariak banatu ziren.
Lehenengo urtea izanda, 11 taldek parte hartu zuten lehiaketan. Batzuk, ez zituzten ordu gehiegi pasa grabaketan, baina izan ziren serioago hartu zutenak. Umorea gailendu zen film laburretan, eta noski, inauterietan egiten diren Parodietan bezala, herriko erreferentzia asko topatu zituzten ikusle eta epaileek. Epaileek haien balorazioak eman, eta korto onena Eruak Heldu Ttuk taldearena izan zen. Ane Muñoz (zinemagilea), Lander Berges (Papillon Zine Klubeko kidea), Imanol Saiz (HITZAko ikus entzunen arduraduna) eta Patxi Muñoz (Olinpiadetako kidea) izan ziren epaileak, eta haien ustez, film labur onak eta dibertigarriak aurkitu zituzten. “Ez genuen espero horrenbesteko maila. Lehenengo urtea izateko lituratutak geratu gara”, adierazi zuten epaileek, denek bat eginez.
Sari ugariak
Sariak hurrengoak izan ziren:
- Soinu baliabide onena: Atletik Klub Txiplau
- Gidoi onena: Nahaste Borraste
- Irudi baliabide onena: Eruak Heldu Ttuk
- Aktore onena: Haizea Kanpandegi (Txoro Bolara) eta Urko Iridoy (Amonan Txikhotia)
- Korto onena: Eruak Heldu Ttuk
Alfonbra gorriaz gain, photocall bat jarri zuten Komite Olinpikoko kideek. Bertan, talde guztiek haien argazkiak atera zituzten. Hona hemen HITZAk ateratako argazkiak:
