Plazara Plazatik, sortzaileen gunea
Bidasoko eta Oarsoaldeko arte eszenikoen gida egin du OARSO BIDASOKO HITZA-k: Plazara Plazatik. Bertakoak izan eta euskarazko eskaintza duten sortzaileen topagunea hedabidearen webguneetan ikus daiteke.
Plazara Plazatik Bidasoko eta Oarsoaldeko arte eszenikoen gida sortu du OARSO BIDASOKO HITZA-k. Bi eskualdeetako euskarazko tokiko hedabidearen bi webguneetan ikus, kontsulta eta erabil daiteke gida. Arte eszenikoetan dabiltzanen topagune antzekoa da euskarria. Inguruan diren sortzaileen kopurua, eskaintza eta kalitatea handi-handia baita, eta horiei guztiei ikusgarritasuna emateko bokazioa du egitasmoak.
Hitza-k bere orrietara eta webguneetara ekarri dituen artisten zerrenda izugarri handia da. Zer eta nola egiten duten, non ariko diren, zergatik sortzen duten, zein amets dauzkaten… Horiek denak biltzen saiatzen da. Kultura baita gizartea ulertzeko, batzeko, eta errealitateaz jabetzeko dagoen armarik nabarmenenetakoa. Baina arte eszenikoetan dabiltzanen gune iraunkorrik ez du izan gaur arte hedabideak. Plazara Plazatik da elkargune hori.
Bertan, HITZAkide egin direnek dute txokoa. Jada dozenaka dira euren fitxa egina duten sortzaile eta taldeak. Nola ez, orori zabalik den espazioa da Plazara Plazatik, eta bertan txokoa izan nahi duenak HITZA-rekin harremana besterik ez du egin behar.
Ezagutu, eta harremana egin
Txarangak, elektrotxarangak, ipuin kontalariak, genero guztietako musika taldeak, DJak, txistulariak, dultzaineroak, antzerki konpainiak, bakarrizketa egileak, abesbatzak, dantza talde eta konpainiak, bertsolariak… Denetik aurki daiteke gidan. Baina den-denek bi ezaugarri komun dituzte: bertakoak dira, eta euskarazko eskaintza dute.
Hala, sortzaile bakoitzaren fitxan haien ezaugarriak eta eskaintza era zabalean ikus ahalko dira. Eta are garrantzitsuago dena: haiekin harremana nola egin garbi ikus daiteke. Izan ere, herrietako festa, ekitaldi, jarduera edo ospakizunetan beharrezko eta ezinbesteko dira artista horiek guztiak, eta antolaketa lanak egiten dituztenek erraztasun osoz izango dute euren jarduerak bertako sortzaileekin nola aberastu. Plazara Plazatik.
