Unai Amiano, B Serieko buruz buruko txapeldun
Larunbatean, profesionaletako lehenengo txapela lortu zuen B Serieko buruz buruko finalean Ander Muruari 22-7 irabazi ostean.
Esku huskako denboraldiak hiru txapelketa nagusi ditu: lau t’erdikoa, binakakoa eta buruz burukoa. Unai Amiano irundarrak horietako bi finaletan aritzeko aukera izan du B Seriean. Iazko azaroan, lau t’erdikoan Beñat Senarren aurka finala Irunen galdu ondoren; larunbatean, hilak 23, Iruñeko Labrit pilotalekuan, profesionaletan jantzi duen lehenengo txapela lortu zuen Ander Murua mendean hartuta (22-7).
Profesionaletan daraman zortzi hilabete eskasean, sekulakoa egin du irundarrak. Profesionalen artean lekua egitea lortu. du, eta nola egin gainera. Azaroan, profesionaletan estreinakoa zuen txapelketaren debuta izan zuen. Lehenengo lau koadroetan jokatzen den txapelketan bigarren izan zen, finala Senarren aurka galduta. Uranzun ez ditu esperotako emaitzak lortu orain arte.
Buruz burukoan, ordea, lau t’erdiko arantza kentzeko aukera baliatu zuen eta final zortzirenetako kanporaketatik hasita, partida guztiak irabazi ditu. Seitik sei. Adituen artean, Amianok sekulako gorakada izan du azken hilabeteotan. Finalaren bezperetan, Muruak argi adierazi zuen Amiano beste pilotariak baino koska bat gorago ibili izan dela txapelketan zehar. Finala txapelketaren isla izan da, eta hasieratik nagusitasunez aritu zen 22-7 markagailua lortu arte.
Buruz burukoa amaituta, pilotariek atseden hartzeko tartea izango dute. Denboraldiko hiru txapelketa garrantzitsuenak amaitu ostean, udako egutegia prestatzen ari dira. Txapelketak ez dira faltako eta herriko jaiekin bat eginez, eta Amianok partidaz beteriko hilabeteak izango ditu.
