Trafiko aldaketak, OCRko Europako Txapelketa dela eta
Ostegunetik igandera, OCRko Europako Txapelketa jokatuko dute Irunen, eta San Jose Obrero futbol zelaiko inguruan aldaketak izango dira.
Irun hilabeteko hitzordu nagusiaren atarian dago: OCRko Europako Txapelketa. Asteazkenetik aurrera, Irun OCRko Europako egoitza bilakatuko da hainbat egunez. Hori dela eta, hirian trafiko aldaketa txiki batzuk izango dira datozen egunotan. Antolatzaileek adierazi zutenez, lasterketek mendia eta hiria uztartuko dute. Hirian barrena, espaloitik ariko dira gehien bat atletak. Hala ere, kale batzuk moztuko dituzte ibilgailuentzat.
San Jose Obrero futbol zelaian probak hasi eta amaituko dira, eta gauzak horrela, ekainaren 1era arte Virgen Milagrosa kaleko aparkalekua itxita egongo da. Ostiralean, hilak 29, 8:30etik 14:00etara ezin izango da Santa Elena kaletik Larreaundira sartu, eta ibilgailuak San Martzial kalera desbideratuko dituzte. Virgen Milagrosa kaleko eta Alde Zaharreko sarbidea mugatuta egongo da, eta Alde Zaharreko irteera Sargia eta San Martzial kaleetatik egin beharko dute.
Larunbatean, 8:30etik 16:00etara ostiraleko trafiko aldaketak indarrean egongo dira, eta Virgen Milagrosa kalea itxiko dute. Larunbatetako ohiko azoka Ospitale Zaharretik Korrokoitz kalera aldatuko dute. Igandean, 8:30etik 16:00etara Virgen Milagrosako noranzkoan Jesus, Eguzkitza eta Vega de Eguzkitza kaleak itxita egongo dira.
Lasterketak amaitu eta herritarren segurtasuna bermatu ahala murrizketak kenduko dituzte. Bitartean, aldaketak errespetatzeko deia egin diete irundarrei.
