Irungo EH Bilduk kreditu aldaketarako zuzenketa sorta proposatu du
Etxebizitza, tokiko kultura, ekipamendu publikoak eta auzoen kohesioa suspertzeko 490.000 euroko hobekuntzak proposatu dituzte.
Berriki, maiatzeko udalbatzan onartuko duten kreditu aldaketaren berri eman zuen udalak. 6,2 milioi eurora handituko dutela adierazi zuen Cristina Laborda alkateak. Horren baitan, hiria hobetzen jarraitzeko zenbait konpromiso hartu zituen. EH Bilduk, ordea, proposamen horren gaineko zazpi zuzenketa aurkeztu ditu. Etxebizitza, kultura, ekipamendu publikoak eta auzoen kohesioa suspertzeko 490.000 euroko zuzenketa sorta proposatu du. “Zuzenketa hauen bidez EH Bildurentzat lehentasunezkoak diren hainbat gai mahai gainean jarri ditugu. Kreditu aldaketa ez da tramite huts bat. Udalak gai batzuetan erantzun irmoagoak emateko aukera hori baliatu nahi dugu”, adierazi du Oihane Briones Irungo EH Bilduko bozeramaileak.
Etxebizitza herritarren kezka nagusia dela jakitun, EH Bilduk etxebizitzaren sektorerako 130.000 euro proposatu ditu. Etxebizitza hutsak mobilizatzeko programa espezifikoa sortzeko proposamena egin du, bai eta programa egikaritzeko pertsona bat kontratatu. Horrez gain, etxebizitzari buruzko ordenantza berria idaztea eskatu dute, babes soziala eta larrialdiko etxebizitzak arautzeko. Honen helburua gizarte ongizatea eta etxebizitza-politikak integratzea da, Iruñeko Aukera Ordenantzaren eredu arrakastatsua erreferentziatzat hartuta.
Bestalde, tokiko kultura suspertzeko 160.000 euroko zuzenketak proposatu ditu Irun eta Bidasoaldeko kultur sarea indartzeko. Kopuru horretatik 30.000 euro Urdanibiako kapera zaharra Kafe Antzoki bihurtzeko proiektu teknikoa idaztera bideratuko dute. 50.000 euro udazkeneko kultur jaialdia sortzeko bideratuko dute, tokiko artistei ikusgarritasuna eman nahian. Gainerako, 80.000 euroak urtean zehar egiten diren kultur eta auzoetarako egitasmoak egiteko karpa bat erosteko erabiliko dituzte.
Azkenik, bizitza komunitarioa bultzatzeko 200.000 euro planteatu dituzte. Duela aste gutxi estreinatutako Emigrazio eraikinean auzo bulegoa txertatzeko proiektua aurkeztu dute. Bertan, HAZ bulegoa, Gizarte Zerbitzuen arreta gunea eta CBArekin saretua dagoen liburutegia egiteko proiektua propoasatu dute. Gainera, Hirubide institutuko patioa egokitzeko eta eskola orduetatik kanpo jardueretarako erabiltzeko proposamena egin du EH Bilduk.
