Erdi Aroko pintxoak, ostiraletik aurrera
Zortzi tabernek hartuko dute parte Erdi Aroko Pintxo Lehiaketan. Hilaren 29tik ekainaren 7ra arte izango dira pintxoak barretan.
Erdi Aroko Pintxo lehiaketan Erdi Aroko osagaiak erabili behar dira. Hau da, tomatea, piperra edo patata ezin dira erabili, Ameriketatik ekarritakoak izan zirelako. Horregatik, Estitxu Urtizberea zinegotziaren ustez, “erronka zaila” da herriko sukaldariek osatzen dutena. Aurten, maiatzaren 29tik ekainaren 7ra egingo da lehiaketa, eta herriko zortzi tabernek hartuko dute parte.
- Badia
- Batzoki
- Danontzat
- Enbata
- Hondar
- Itxaropena
- Mika
- Tatapas
Horiek izango dira tabernak. Bakoitzak pintxo bat prestatu du, eta hori bera probatzeko aukera izango da tabernetan. Epaimahaia Xabi Izagirrek (Arraunlari Berri jatetxea), Arantza Ayalak (Laia erretegia) eta Gonzalo Bustok (Estebenea eta Borda Berri) osatuko dute. Haien sariaz gain, herritarrek beste sari bat emateko ahalmena izango dute. Horretarako, hiru pintxo probatu beharko dituzte gutxienez. Tabernetan dauden esku orrietan tabernek zigilu bat jarriko dute, eta hiru lortzerakoan, sailkatu eta entregatu egin beharko ditu herritarrak.
“Parte hartzen duten establezimenduek lan handia egiten dute proposamen original eta kalitatezkoak eskaintzeko, eta hori oso garrantzitsua da bai herritarrentzat bai bisitarientzat esperientzia berezi bat sortzeko”, esan du Urtizbereak. Era berean, azpimarratu du ekitaldiak “giro aparta sortzen duela hirian, gastronomia, historia eta aisialdia uztartuz”.
