Afrikaren Egunean, Behar Bidasoa eta Afrika elkarlanean
Behar Bidasoak 50 urteko ibilbidea nabarmendu du, eta urteotan Kabugan (Ruanda) garatutako etxebizitza programaren eragina azpimarratu dute.
Gaur, hilak 25, Afrikaren Eguna da. Hori dela eta, Behar Bidasoak 50 urteotan Afrikarekin egindako lankidetza nabarmendu nahi izan du, bereziki Kabugan (Ruanda) hasitako harremanak azpimarratu dituzte. Azken urteetan, hainbat arlotako proiektuak garatu dituzte Ruandan, Tanzanian, Kenian eta Togon; hala nola, hezkuntza, prestakuntza, garapen komunitarioa eta bizi-baldintzak hobetzeko. Balioak nabarmendu eta etorkizuneko garapenaren aldeko konpromisoa berritu du elkarteak.
Behar Bidasoa eta Afrikaren arteko lotura Jose Ramon Amunarrizen etorrerarekin hasi zen, eta urteetan zehar sendotu dute tokiko komunitateekin elkarlanean, gertutasunean eta jarraitutasunean oinarritutako eredua. Nazioarteko lankidetzarentzat gero eta konplexuagoa den testuinguruan, Behar Bidasoak pertsonen duintasunean, komunitateen indartzean eta epe luzeko lan jarraituann oinarritutako eredua berresten du.
Garatutako proiektuen artean, Kabugan garatutako etxebizitza programaren eragina azpimarratu du elkarteak. Proiektu honen bidez, familia askok etxebizitza duina eskuratu dute, baita segurtasuna, osasuna eta egonkortasuna hobetu ere. Era berean, ur edangarria eskuratzeko azpiegituren garapenak aldaketa handia ekarri duela adierazi dute. Milaka pertsonari ur segurua eskuratzeko aukera eman die askori, bai eta gaixotasunak murriztu, eskolatzea erraztu eta emakumeen eta haurren gain zegoen zama arindu.
Gainera, hezkuntzaren aldeko apustu sendoa egiten jarraitzen du Behar Bidasoak. Tokian tokiko proiektuen eta babes programaren bidez, egoera zaurgarrian dauden haurrei hezkuntzarako sarbidea bermatu nahi die elkarteak.
