Ane Gomezek eta Judas Arrietak bereganatu dituzte Hondarribia Sormen Hiria bekak
Bi artista hondarribiarren lanak aukeratu ditu epaimahaiak: Gomezen 'Baratza Bizia' eta Arrietaren 'Otaku baten margoak'.
Hondarribia Sormen Hiria bekak baditu aurtengo garaileak: Ane Gomez eta Judas Arrieta. Bi artista hondarribiarrek haien proiektuak aurkeztu dituzte, eta 6.560,55 euroko beka jasoko dute, epaimahaiak haien lanak aukeratu ondoren. “Benetan interesgarriak eta ausartak diren proposamenak ikusi ditugu aurten”, adierazi du Jonan Basterretxea epaimahaikideak.
Iaz eman zen lehen aldiz Hondarribia Sormen Hiria beka eta irabazleak Julia Lasa eta Naiara Goikoetxea izan ziren. Aurten, bi lan garaileak Gomezen Baratza Bizia eta Arrietaren Otaku baten margoak. “Deialdia urtez urte sendotzen ari dela ikusten da, eta gero eta argiago geratzen da Sormen Bekek espazio baliotsua eskaintzen dietela sortzaileei euren ideiak garatzeko”, esan du Ortzi Alonso Kultur zinegotziak.
Gomezen Baratza Bizia proposamena bere “dimentsio sozial eta komunitarioagatik nabarmendu da”, Hondarribiko Udalaren ustez. Basterretxeak azpimarratu du proiektuak modu koherentean uztartzen dituela ikerketa, sorkuntza plastikoa eta ikus entzunezko narratiba.
Bost urterekin sartu zitzaion Gomezi arte ederretako grina. Margoketa akademia batean eman zuen bere haurtzaroa, olio teknikarekin marrazten. Arte Ederrak ikasi zituen Euskal Herriko Unibertsitatean, eta 20 urterekin Hego Amerikara joan zen, bertan Arte Plastiko, Elektroniko eta Denboraren arloko maisutza osatu zuen Los Andeetako Unibertsitatean, Kolonbian. Duela urte batzuetatik hona, muralista gisa ere lan egiten du, hainbat espazio motatan pintatuz. Bere obran, Anek kolorearen erabilerak aztertzen ditu, eta pinturaren materialtasunak balio berezia hartzen du.
Asiar kulturarekin harremana
Arrietaren lana, aldiz, bere nazioarteko izaeran oinarritzen da, asiar kulturarekin oso harremandua baitago artista hondarribiarra. “Sorkuntza-prozesu esperimentala eta irekia planteatzen du, eta praktika artistikoa eta testuinguru kulturalak konektatzen ditu”, esan du Seijok.
Arrietak ere arte ederrak ikasi zituen EHUn. 1995. urtetik ehunka proiektutan hartu du parte. Hainbat museo eta galerietan izan dira bere erakusketak, eta 2000. hamarkadatik oso lotuta izan da asiar kulturara. Txinan bizi izan zen, eta Japoniarekin ere harreman zuzena du bere lanen bitartez.
