E30 linea udan, eta aurrerago urte osorako
Hirugarren urtez segidan Lurraldebusek E30 linea aktibatuko du udan, ekainaren 1etik aurrera zehazki.
Azahara Dominguez eta Igor Enparan, zerbitzuaren berri emateko agerraldian. Hirugarren urtez segidan Lurraldebusek E30 linea aktibatuko du udan, ekainaren 1etik aurrera zehazki. 2024an izan zen martxan lehenengoz, eta iazko datuak ikusita, aldundiak erabaki du berriz ere indarrean jartzea Donostiako erdigunea eta Hondarribiko aireportua zuzenean lotuko dituen garraio publiko zerbitzua. Iaz, esaterako, 14.000 bidaiarik erabili zuten E30, 2024an baino %83 gehiagok. Gainera, Azahara Dominguez Gipuzkoako Foru Aldundiko Mugikortasun, Turismo eta Lurralde Antolaketarako diputatuak adierazi du E30 urte osoan martxan izatea dela haien asmoa, behin Oarsoaldeko eta Bidasoko Lurraldebuseko emakida berria indarrean denean. Dominguezek berak eta Hondarribiko alkate Igor Enparanek eman dituzte E30aren gaineko argibideak.
Astelehenetik larunbatera, Donostiako Gipuzkoa plazatik hamabi irteera egingo ditu E30ak, lehena 07:00etan eta azkena 20:00etan, kasurik gehienetan ordubeteko maiztasunarekin (12:00etan da goizeko azkena; 14:15ean arratsaldeko lehena). Aireportutik Donostiara joateko 11 autobus izango dira, lehenaren irteera 07:30ean izango delarik ordubeteko maiztasunarekin (goizeko azkena 13:00etan izango da, arratsaldeko lehena 14:15ean), eta azkenarena 21:45ean. Igandeetako ordutegia ia berbera da, autobusen kopurua mantentzen da ordutegi aldaketa txikiekin. Autobusek maletak gordetzeko tokia izango dute.
Hala, diputatuak adierazi du E30a, E21aren osagarri izango dela udan; azken hori, ordea, ez da sartuko aireportu barruko geltokira E30 martxan den bitartean.
Dominguezek zehaztu du aireporturako joan-etorriak zerbitzu azkar, eroso eta eskuragarrien bidez erraztuko direla oraingoz udakoa izango den linea horrekin, “eta gure autobusen ordutegia dagoen hegaldi-eskaintzara egokituko dugu. Horrela, herritarrek ez dute ibilgailu pribatuaren edo hirugarren pertsonen mende egon beharko aireportuetara iristeko”.
Enparan zerbitzua abian jarriko delako baikor mintzatu da, azalduz aireportua Hondarribiaren eta Bidasoaren konektibitate estrategikorako funtsezko azpiegitura dela. “Horregatik, oso positibotzat jotzen dugu aireportuarekin lotutako zerbitzuak indartzea eta Donostiarekiko konexioak hobetzea”.
