Astelehenean hasiko dira Pasaia kaleko obrak
Kalearen berrurbanizazio osoa egingo dute, eta beraz, denbora luzez obrak izango dira bertan. Hiru fasetan egingo dute aldaketa, Foru kaleko aldetik hasita.
Estitxu Urtizberea Hirigintza zinegotziak behin baino gehiagotan aipatu du Pasaia kaleko berrurbanizazioa oraingo udal gobernuaren hirigintza egitasmo handienetariko bat izango dela. Pasaia kaletik ehunka auto pasatzen dira egunero, eta oinezkoentzako pasabideak zaharkituak gelditu dira jada. Horregatik, “segurtasuna bermatzeko” xedearekin hasiko dira bertako obrak. Ez dira motzak izango, eta Arrantzale auzoan egin den moduan egingo dira, hau da, aldika. Hiru zatitan banatu dituzte obrak, eta ia 2 milioi euroko aurrekontua kudeatuko dute.
Lehenengo zatia Foru kaletik gora egingo dute, biribilguneraino. Bertan, aldaketa nabaria izango da biribilgunean. “Oinezkoentzako pasabideak berrantolatuko dira eta egingo diren aldaketek ‘trafiko lasaitua’ deritzona ahalbidetuko dute, hau da, ibilgailuak mantsoago joatea. Honek guztiak ingurunea seguruagoa eta erosoagoa bihurtzea ekarriko du”, azaldu du hirigintza zinegotziak. Eskolara joaten diren haur asko kale hortatik pasatzen dira, eta berdin gertatzen da kiroldegira doazen herritarrekin, beraz, irisgarritasuna eta segurtasuna beharrezkoak dira.
Kale erdian dagoen biribilguneak hurrengo itxura izango duela aurreikusten dute:
Baina errepidea ez da aldatu beharreko gauza bakarra. Lurpeko azpiegiturak aldatuko dituzte, egun fibrozementuzkoak diren saneamendu sistemak zaharkituak daude eta. “Bizilagunek denbora luzez eskatu duten hobekuntza da, eta berrurbanizazio honekin behingoz gauzatuko da”, gehitu du Urtizbereak.
Pasaia eta Errenteria kaleak bat egiten duten eremua horrela aurreikusten dute:
Noski, obrak irauten duten bitartean, trafikoa moztuta egongo da. Lehenengo fasean, biribilgunetik Foru kalera itxiko dute, eta beraz, Pasaia kaletik jaitsiz gero, Donostia kalera mugitu beharko dira autoak biribilgunean. Halere, bertan bizi direnek haien garajeetara pasatzeko eskubidea izango dute.
Nestor Basterretxeatik jaitsiz, Pasaia kaleko lehen zatiak itxura hau izango luke udalaren ustez:
