Udal Akademiako ikasleen lanak Amaia KZn ikusgai izango dira
Guztira, 70 ikaslek ikasturtean zehar egindako 200 lan baino gehiago bisitatu ahalko dira ostiraletik, hilak 22, maiatzaren azken egunera arte.
Amaitzear da 2025/2026 ikasturtea, eta horrekin batera Marrazketa eta Pintura Udal Akademiako ikasleek hilabeteotan zehar egindako lanak ikusgai egongo dira Amaia KZn. Guztira, adin guztietako 70 ikaslek egindako 200 obra baino gehiago jarriko dituzte erakusketan. Ostiral honetan, hilak 22, inauguratuko dute, 19:00etan. Asteartetik larunbatera 18:00etatik 21:00etara, eta igandeetan zein jaiegunetan, 11:30etik 13:30era bisitatu ahalko dute, hilaren 31ra arte.
6 urtetik 95 urtera bitarteko hiritarrek eskaintza zabaleko lanak egin dituzte. Planteamendu kubistak, Maria Blanchard margolarian inspiratutako lanak, boligrafo urdinez egindakoak eta Clara Peetersen obran inspiratutakoak aurkitu daitezke. Baita gazte taldeak Martindozenea Gaztelekuan egindako Artistak gara erakusketaren lanak ere. Haurren kasuan, oihalak, alanbrea eta akuarelak erabili dituzte.
“Pozgarria da urtero Amaia KZra joatea egun hauetan eta emaitza aurrez aurre ikusi ahal izatea”, adierazi du Nuria Alzaga Kultura ordezkariak. Erakusketa ikasturtean zehar Anaka auzoko Fabiola Erregina kaleko instalazioetan egiten denaren isla da.
