Hondarribiko Udalak aplikazio berri bat estreinatu du
Herriko agenda osoa ikusi ahalko da bertan, eta udal zerbitzuen informazioa. Horrez gain, elkarteek haien atal berezia izango dute, haien berriak igotzeko.
Hondarribiko Udalak mugikor aplikazioa estreinatu du. Informazioa, zerbitzuak eta agenda ikusi ahal dira bertan, besteak beste. Herritarrak informatuak egotea eta informaziora modu errazago batean iristea da aplikazioaren helburua. Herritar bakoitzak bere erabiltzailea sortu dezake, eta gustuko dituen elkarteak jarraitu, haien informazioa eta agendak jasotzeko.
Gaur egun teknologia digitala gure egunerokoaren zati oso handi bat da. Edozertarako erabiltzen dugu mugikorra, eta geroz eta gehiago dira ordenagailua alde batera utzi eta web orriak mugikorretik begiratzen dituztenak. Hori bera errazteko, aplikazioak ezinbesteko tresnak dira. “Gaur egun kontsulta eta kudeaketa gehienak mugikorretik egiten ditugu, eta horrek argi erakusten du beharrezkoa zela herritarrei informazioa eta udal zerbitzuak modu eroso eta zuzenean eskaintzeko aplikazio bat edukitzea”.
Abotsanitzek, haien legealdi hasieratik adierazi dute udal egiturak modernizatzearen eta egokitzearen apustua egitea garrantzitsua dela. Komunikazioa “erraztea” da horrelako erabakien oinarria udal gobernuaren ustez. Azkeneko bi urteetan garatutako proiektua izan da, eta ibilbidean hainbat herri eragilek parte hartu dute, haiek baitira aplikazioko protagonista handienetarikoak.
Bateratua
Elkarteek haien jarduerak argitaratu ahal izango dituzte, bateratutako agenda batean. Horrez gain, erabiltzaile bakoitzak gustukoen dituen elkarteak jarraitu ahalko ditu, haiek egindakoa ikusiz. Orain arte udal zerbitzu bakoitzak bere agenda zuen, hala nola kulturak, gazteriak eta liburutegiak. Orain denak batera ikusi ahalko dira. “Hondarribia bezalako herri bizi eta aktibo batean, funtsezkoa da herrian antolatzen diren ekitaldi eta proposamen guztiak leku bakarrean eskuragarri izatea”, esan du Enparanek.
Horrez gain, beste hainbat zerbitzu daude aplikazioan, hala nola aurretiazko hitzorduak eskatzea, iragarki taula digitala, sarreren erosketa zuzena eta udal zerbitzuen informazioa. App Store eta Google Play plataformetan dago eskuragai. Udalak azaldu du aplikazioa hobetzen joango direla, eta gutxinaka tresna berriak gehitzen.
