EAJk esan du Ondartza futbol zelaiko belarra berritzeko momentua orain dela
Alderdi jeltzaleak Madrilen egindako akordio batek belar artifiziala jartzea ahalbidetuko duela dio EAJk. Azkartasuna eta aukera ez galtzeko eskaera egin dio udalari.
Artxiboko argazki bat. Urteak daramatzate Hondarribia Futbol Elkarteko kideek Ondartza futbol zelaiko belarra artifizialaren zain. 2019. urtean, proiektua gauzatu zuten, baina estatu espainiarrak ez zuen baimenik eman. Orain aldiz, Hondarribiko EAJk adierazi du aukera paregabea duela Hondarribiko Udalak belar artifiziala jartzeko, EAJk Madrilen bultzatu duen akordio bat dela eta.
Jeltzaleek adierazi dute lurzoruen desafekzio prozesuak aurrera egiten jarraitzen duela. “Hurrengo asteetan, espedienteak urrats erabakigarria emango du bere tramitazioan, Ogasun Ministerioaren esku geratuz, hark kudeatuko baitu lurzorua Hondarribiko Udalari lagatzeko prozesua”. Egun, belar naturaleko zelaia dago Ondartzan, baina futbol elkarteak aldaketa “beharrezkoa” ikusten du.
Horrez gain, aipatutako akordioak lortu du kostaldearen antolamendu eta kudeaketaren eskumena Eusko Jaurlaritzaren esku gelditzea. “Horrek esan nahi du Hondartza futbol zelaiko obra egiteko baimena orain Portuak, Itsas Gaiak eta Litoralaren Zuzendaritzaren esku dagoela”. Eusko Jaurlaritzaren esku gelditzen da beraz, eta EAJk hortan aritzeko konpromisoa erakutsi nahi izan du.
“Ezin da aukera hau galdu”
Hori dena dela eta, EAJk uste du orain udalaren txanda dela. “Azkartasunez jokatuz gero, belar artifiziala jartzea errealitate izan daiteke 2026an”, esan dute jeltzaleek. Horretarako, udalak duela aste batzuk proposatutako kreditu aldaketa onartzea beharrezkoa da, 2019an egindako proiektu eguneratzeko. “Ezin da aukera hau galdu”, amaitu du EAJk.
