Gazteak On: Elikadura Erronkaren bozketak zabalik
Hilaren 29ra bitarte, herritarrek aukera izango dute aurkeztutako 21 bideo ikusteko eta bozkatzeko; irabazlea ekainaren 5ean erabakiko dute.
Bigarren urtez jarraian, Gazteak On: Elikadura Erronka antolatu dute Irunen, Hondarribian eta Hendaian. Aurtengoan, 21 lan aurkeztu dituzte hiru herrietako ikasleek. Maïa Permaculture kooperatibak eta Bidasoa Txingudi eskualdeko elikadura-kontsumo taldeek —Labore Txingudi eta Hendaiakoop— sustatutako egitasmoak elikadura burujabetza du ardatz. Horren hausnarketa, ikerketa eta sentsibilizazioa bultzatzeko proiektuak egin dituzte hilabeteotan ikasleek. Dagoeneko herritarren bozka irekiaren fasea ireki dute, eta hilaren 29ra arte aukera izango dute aurkeztutako proiektuen artean gustukoena duten proiektua bozkatzeko.
Egitasmo honek bi sari banatuko ditu. Alde batetik, herritarren saria; eta beste alde batetik, epaimahaiaren saria. Irekita dagoen fase honek herritarrak jartzen ditu erdigunean. Proiektuak saritzeaz gain, gazteek egindako lana zabaltzea eta komunitatea elikadurari buruzko hausnarketan inplikatzea ere nahi dute. Iaz, 1,173 bozka jaso zituzten. Hala ere, itxaropentsu dira aurtengoari begira: “Lan eta parte hartzaile kopurua ikusita, kopuru hori gainditzea gustatuko litzaiguke”.
Ikasleek bi minutuko bideo laburrak egin behar izan dituzte, eta aurtengo proiekturik bozkatuena ekainaren 5ean jakinaraziko dute. Sari banaketa Ficoban egingo dute, Bioterra azokaren baitan. Horrela, komunitatearen, hezkuntzaren eta elikaduraren arteko lotura indartuko dutela ziurtatu dute antolatzaileek. “Uste dugu belaunaldi berriei ahotsa ematea funtsezkoa dela elikadura eredu kontzienteago eta arduratsuago baterantz aurrera egiteko”. Herritarrei dei egin diete bozketan parte hartzeko.
