Dominaz beteriko asteburua Super Amara BAT taldearentzat
Txapelketaz beteriko asteburua izan dute taldeko gazteenek, eta harrobiak sasoia duela erakutsi dute 20 domina eskuratuta.
Atletismoak ez du etenik, eta asteburu honetan harrobiaren txanda izan da. 18 eta 20 urtez azpiko Euskadiko Txapelketan eta 16 urtez azpikoen Federazioen Txapelketan izan dira Super Amara BAT taldeko hainbat atleta, Ourensen jokatutako jardunaldian. Bidasoarren harrobiak asteburuz asteburu egiten duen lana izugarria da. Esaterako, asteburu honetan 20 domina eta marka pertsonal ugari lortu dituzte Euskadiko Txapelketan.
20 urtez azpiko Euskadiko Txapelketan, sei urre, zilarrezko domina bat eta brontzezko beste bat lortu zuten. Jon Gajate, 110 metroko hesi lasterketan; Arielle Ngole, diskoan eta pisuan; Lukas Cabezon, 1.5000 metrotan; Alai Cabello, 800 metrotan; eta Xuban Yarza, xabalinan lehenengoak izan ziren.
18 urtez azpikoetan, sei urrezko domina, zilarrezko lau eta brontzezko bi. Eñaut Arburuak, 400 metrotan; Olatz Elizasuk, diskoan; Gorka Garciak, 1.500 metrotan; Jon Andianok, 400 metroko hesi lasterketan; Noa Garciak, altueran; eta 4×100 metroko erreleboetan garaipena eskuratu zuten.
Bestalde, Super Amara BAT taldeak SOS arrazakeriaren Bizilagunak programan parte hartu du. Igandean, hilak 10, Etxean edo parkean, harremanak elikatzen lelopean, klubak bazkari bat antolatu zuen Zubia Kirola taldeko Afrikatik etorritako zortzi kiderekin batera.
