Amute eta Mendelu inguruko biribilgune berriak, laster martxan
Felix Urkola diputatuak esan du obrak urte bukaeran hasteko aurreikuspena egiten dutela. Aldaketek oinezkoen segurtasuna bermatzea eta herriko sarrera eta irteerak askatzea dute helburu.
Hondarribiko udaletxeko areto nagusian elkartu dira gaur Igor Enparan alkatea, Eider Mendoza Gipuzkoako diputatu nagusia eta Felix Urkola Bide Azpiegituretako eta Lurralde Estrategiako diputatua. Helburua argia izan da: Amute eta Mendelu inguruetako saihesbideak aurkeztea, bertako trafiko jarioa jaisteko asmoarekin. Bidasoaldeko Plan Integralaren parte dira, eta Irungo ekintzak azaldu dituzten moduan, banaka aurkeztu dituzte Hondarribikoak.
Hiru dira proiektu nagusiak. Haietako bi jada aurrera doaz, eta obra lizitazioa aurten gauzatzea aurreikusten dute. Amuteko biribilgunea eta Amutaldeko saihesbidea izango litzateke horiek biak. Ondoren, aipatutako obrek trafiko jarioa murriztuko lukete Mendelu auzoan, eta horrek hirugarren proiektu bat ahalbidetuko luke: Mendeluko bidegorria osatzea, eta era berean, espaloiak zabaltzea, segurtasunaren alde. Felix Urkola diputatuak adierazi du haien aurreikuspenak jarraituz, urte bukaeran hasiko liratekeela obrak.
Amuteko biribilgunea
Gaur egun, Mendelutik joanda, Amutera sartzeko semaforo batekin egiten du topo edozein pertsonak, aireportutik datorren errepidea zeharkatzen duena. Bidasoaldeko Plan Integralean, bertan sor daitezkeen ilarak ekiditeko, biribilgune bat proposatzen dute. “Herriko sarrerak eta irteerak asko hobetuko ditu, eta gainera segurtasunaren aldeko apustua da”, azaldu du diputatu nagusiak. Horrez gain, txirrindei begira bidegorri sarea hobetzea bada aurkeztutako helburuetako bat. Horregatik, aireportuko errepide guztian bidegorria ezarriko da, Amute eta Alameda inguruko bidea lotzen dituena.
Biribilgune berriak 1,3 milioi euroko gastua eskatuko du, eta horrez gain, bidegorria eta oinezkoentzako bide berriak 2,07 milioikoak. “Biribilgunean 5 hilabeteko aurreikuspena dugu, eta bide gorria aldiz, 7 hilabetekoa izango da”, esan du Urkola diputatuak. Lizitazioa aurten gauzatuko dela diote, eta beraz, diputatuak egindako aurreikuspena, hau da, obrak aurten hasi daitezkeela, bete daiteke.
Amutaldeko saihesbidea
Obra handiena Amutaldeko saihesbidea izango da, N-636 eta N-638 errepideak lotuko lituzkeena. Errepide bakoitzean biribilgune bat egingo da, eta biak beste bide batekin lotu, bertan dauden baratzeetatik pasatuz. “Argi dago obra berri honekin herriko sarrerak eta irteerak asko askatuko direla, ekarpen handia da”, esan du Mendozak. Enparanek azaldu du, N-636 errepidean auto ilarak izaten direnean, nabigazio aplikazioek gidariak Mendelutik bideratzen dituztela, horrela auzoan pilaketak sortuz, eta alternatiba berriarekin hori bera konponduko dela.
Proiektu hori jendaurreko prozesuan dago ere, beraz aurrera doa. 18 hilabeteko epea izango du obrak, eta 6, 7 milioi euroko gastua izango da. Horrez gain, Zubieta eremuarekin lotura zuzena izango dute bi errepideek, inguru horretan hainbat plan daude mahai gainean eta.
Mendeluko bidegorria
Mendozak azaldu du saihesbideak trafikoa jaitsiko duela Mendelun, eta horrek beste plan baten ahalbidetzea gauzatuko duela: Mendeluko bidegorriarena. Urteak dira Mendeluko errepidean hobekuntzak eskatzen dituztela bertako auzokideek, eta orain, Gipuzkoako Foru Aldundiak bertako segurtasuna hobetzeko eta bidegorria egiteko aukera ikusten du. Proiektua azaldu dute, baina beste biak bezala, ez dago hain aurreratua.
Mendeluko bidegorriak Irunekin dagoen lotura hobetzeko aukera emango luke. Enparanek azaldu du berri ederra dela Mendeluko bidegorriaren planean pentsatzea, herriak askotan eskaturiko gauza baita.
Guadalupeko hobekuntzak
Azkenik, Guadalupeko elizaren inguruko aldaketak azaldu dituzte. Mendozak esan du eliza inguruetan ez direla segurtasun neurriak bermatzen, eta horregatik, garrantzitsua dela bertatik pasatzen diren autoentzako aldaketak egitea. Zirkulazioa baretzeko plataforma partekatuko bide tarte bat egingo da, errepidearekin alderatuta, altuera handiagoarekin, autoak konturatu daitezen bertan oinezkoak ibili daitezkeela. Horrez gain, gehienezko abiadura 40 kilometroetatik 20ra jaitsiko da.
