Etxeko taldea animatzeko deialdia zabaldu du Hondarribia Futbol Elkarteak
Gizonezkoen lehen taldeak Gorengo mailako lehen postuari eutsi nahi dio, eta larunbatean 17:00etan etxean jokatuko dute, Axular Lizeoaren aurka.
HFEk argitaratutako argazkia. Hondarribiko Futbol Elkarteko gizonezkoen lehenengo taldeak denboraldi aparta darama, eta oraindik, mailaz igotzeko aukera hortxe dute. 56 puntu dituzte, eta hiru partidu aurretik. Haien lehian, 53 punturekin daude Ostadar eta Roteta taldeak. Azken bi partidak ez dira ondo joan, biak galdu dituzte eta, baina asteburu honetan, etxean jokatuko dute, Ondartza futbol zelaian.
Larunbatean jokatuko dute, eta futbol elkartetik, deialdia zabaldu dute, herriari begira, Ondartzara bertaratzeko. Axular Lizeoa talde donostiarraren aurka jokatuko dute, 17:00etan. Axular hamaikagarren da sailkapenean, eta aurreko bi partidak irabazi ditu. Gorengo mailan dago orain Hondarribia, eta lehenengo multzoko hamasei partaideetatik soilik bat igoko da zuzenean. Bigarren sailkatua bigarren multzoko bigarrenarekin lehiatu beharko da, igotzeko beste plaza bat lortzeko. Halere, bigarren plaza Hirugarren RFEF mailako gipuzkoarren baitan dago. Maila hortatik soilik gipuzkoar bat jaisten bada, gorengo mailako hiru igoko lirateke, eta bi jaitsiko balira, soilik bi.
Horregatik, taldea animatzeko xedearekin zabaldu dute deialdia, esan bezala, larunbatean, 17:00etan Ondartza futbol zelaian.
