Emakume Pala Txapelketa, hamaikagarrenez
Maiatza bukaeran egingo dira partiduak, baina jada izen ematea irekita dago. Finala hilaren azken egunean izango da, eta hainbat sorpresa izango dira.
2024ko Emakume Pala Txapelketa. Emakumezkoen palak badu presentzia Hondarribian, eta hori Emeki Emakumeen Elkarteari esker da. Badira urteak jada Emekiren ekimenez emakumezkoen pala taldea sortu zenetik, eta irakasle bati esker klaseak astero jasotzen dituztenetik. Noski, Hondarribiko Udalaren laguntza funtsezkoa izan da proiektua aurrera eramateko. Aurten ere, pala txapelketa egingo dute, hamaikagarren aldiz; hilabete bukaeran, Jostaldi pilotalekuan. Binakako txapelketa izango da.
Maiatzaren 23an eta 30ean egingo dituzte lehenengo partidak, eta finala, maiatzaren 31n izango da. Partida guztiak 10:00etan jokatuko dira, eta gomazko pilotarekin egingo dira lehiak. Partaideek galtza zuriak eraman beharko dituzte, eta lehiaketa hasterakoan, kamixeta gorria eta urdina emango zaie denei. Adierazi dute finalaren egunean jatekoa izango dela, eta hainbat sorpresa prestatu dituztela.
Hamabost puntutara jokatuko dira partidak. Sakea 2tik 3ra egingo da, eta pasa marra 6. zenbakian ipiniko da. Partidu bakoitzeko bi atseden izango dira, eta edozeinek eskatu ditzake. Emekitik eskatu dute, norbait partidura joan ezin bada, denborarekin abisatzeko. Azkenik, izen ematea maiatzaren 6tik, 22ra irekiko dute. Horretarako, esteka honetan klikatuz, emekiemakumelkartea@gmail.com helbidera idatziz edo 943643420 telefonora deituz egin daiteke.
