'Egun on, Irun' lelopean, 2027ko egutegia prestatzen
Udal egutegia sortzeko prozesu parte-hartzailea martxan jarri dute, eta dagoeneko herritarrek argazkiak bidal ditzakete urriaren 31era arte.
Maiatzean egon arren, dagoeneko 2027ko udal egutegia prestatzen ari dira. Egun on, Irun izango da 2027rako aukeratutako leloa, eta dagoeneko egutegia atontzeko argazki bila dabiltza. Argazki bakoitzak Irun ikusteko modu berezi bat irudikatuko du. Bidalitako irudi guztien artetik hamahiru aukeratuko dituzte, hilabete bakoitzeko bat eta azalerako bestea. Lehiaketan parte hartu nahi duen orok udal webgunearen bitartez bost argazki bidal ditzake, gehienez. Argazkiak bidaltzeko azken eguna urriaren 31a izango da.
Lehiaketaren oinarriak honako hauek izango dira: originalak izan (lehiaketatan saritu gabeak eta hedabide profesionaletan argitaratu gabeak), Irungo leku jakin bat identifikatzeko erraza izan, hirugarrenen eskubiderik ez urratzea, .jpg formatuan, 30cm x 20cm-ko tamaina izan eta gutxienez 250-300ppp-ko bereizmena eduki behar du. Bestalde, gogoratu dute argazkian adingaberen bat agertzen bada, argazkilariak bi gurasoen baimena izango du argazkia egutegian argitaratzeko.
“Irun bizirik dago, eta goizero eraldatu egiten da. Kaleak jendez betetzen doaz, dendek eta tabernek ateak zabaltzen dituzte, ikastetxeak klaseekin hasten dira, eta hainbat pertsonek kirola eginez hasten dute eguna. Halako irudiek osatzen dute gure hiriko eguneroko paisaia”, adierazi du udalak.
