Historiaz beteriko 20 urteko ibilbidea gogoratuko dute hilaren 16an
Museoen Nazioarteko Egunarekin bat eginez, Oiasso museorako sarrera doakoa izango da eta hainbat jarduera antolatuko dituzte.
Datorren larunbatean, hilak 16, Oiasso museora doan sartzeko aukera izango dute bisitariek; eta Museoen Nazioarteko Egunaren harira, hainbat jarduera antolatuko dituzte. 20. urteurrenaren jaian herritarrak jarriko dituzte erdigunean, eta arkeologia, oroitzapena eta gizarte-ekintzak uztartuko dituzte.
Hilaren 16an, larunbatarekin, Oiasso museoko terma erromatarrak ezagutzeko bisita gidatuak antolatuko dituzte, eta igandean, Tren Txikitoan Santa Elena ermitarako ibilbidea ere egingo dute. Bisita gidatuetarako sarrerak ohiko bideetatik erosi beharko dituzte, webgunean edo museoan bertan. Bisitak 11:00etan, gaztelaniaz, eta 12:30ean, euskaraz, izango dira.
Bisita gidatuak aparte, hilaren 19an, Mertxe Urteagak Oiasso museoaren sortzaile eta zuzendariak hitzaldi berezia eskainiko du. Asmo izatetik errealitatera: erronkak eta Oiasso museoaren sortze prozesuaren ikasketa, 1996-2006 izenburua duen hitzaldia eskainiko du, 19:00etatik aurrera. Hitzaldirako sarrera librea izango da, aretoa bete arte.
Bestalde, museoak lankidetza-hitzarmena sinatu du Elkarrekin kooperatibarekin. Honen bitartez, familien arteko gizarteratzea eta kulturarako sarbidea sustatuko dute. Familia migratzaileen eta antzeko adinetako seme-alabak dituzten tokiko familien arteko loturak sortuko dituzte, komunitateen arteko zubiak eraikiz.
Akordio honi esker, Ongi Etorri Eskolara proiektuko Familia Laguna programan parte hartzen duten familiek museoko jarduerara sartzeko aukera izango dute, hain zuzen, larunbatetan egiten duten Arkeolab tailerretara eta erakusketa iraunkorraren bisitetara.
