Euskadiko Klubeko Kopan maila altuan lehiatu dira Super Amara BATeko atletak
116 puntu lortuta, gizonezkoak bigarrenak izan dira; eta emakumezkoak, berriz, bosgarrenak izan dira, 96 punturekin.
Asteburu honetan, atletismoko kluben arteko Euskadiko Txapelketa izan da Getxon, Fadurako pistan. Maila eta lehiakortasun handiko asteburua izan da, eta Super Amara BAT taldeak sasoi betean dagoela erakutsi du beste behin ere. Gizonezkoen taldeak bigarren postua lortu du, sailkapen orokorrean 116 puntu eskuratuta. Realarekin lehia estua izan dute, 12 puntura besterik ez baitute amaitu jarduna. Guztira, bost garaipen, lau bigarren postu eta bi hirugarren postu lortu dituzte. Emakumezkoak, berriz, bosgarrenak izan dira, 96 punturekin. Gizonezkoen antzera, emakumeek ere bost garaipen, bi bigarren postu eta hiru hirugarren postu eskuratu dituzte.
Gizonezkoen jardunean atleta azpimarragarrienak Aramendi anaiak, Urko Navarro, Asier Zarandona eta Eñaut Arburua izan dira. Ander Aramendi 1.500 metrotan, Mikel Aramendi 3.000 metrotan, Urko Navarro 400 metrotan, Asier Zarandona diskoan eta Eñaut Arburua 400 metro hesietan lehenengoak izan dira. Azken honek, gainera, marka pertsonala eskuratu zuen.
Emakumezkoetan, berriz, 4×400 metroko erreleboan, Hai Duong Alzagak 200 metrotan, Zuriñe Celisek luzera jauzian, Irune Martinek 400 metro hesietan eta Noa Estebanek xabalinan garaipena eskuratu zuten. 4×100 erreleboetan ez zuten zorte handirik izan, lekukoa erori eta zortzigarrenak izan baitziren. Ezusteko hori azkar ahaztu, eta 4×400 metrokoan nagusitasunez irabaztea lortu zuten.
Hilaren 16an, ligako hitzordu garrantzitsua izango dute Super Amara BATeko atletek. Emakumezkoak Leonen ariko dira Ohorezko Mailan lehiatzen; gizoenezkoek, berriz, Lehen Maila Nazionaleko beste jardunaldi bat izango dute, Madrilen. Bi txapelketak oso garrantzitsuak izango dira taldearen etorkizuna zein izango den bertan erabakiko baita.
Bestalde, Iker Piñeirak Rietin (Italia) jokatuko den 18 urtez azpiko Europako Txapelketan lehiatzeko gutxieneko marka lortu du. Dohibane Lohizuneko mitinean izan da. Piñeirak 200 metrotan beste errekor bat ezarri du, 21.45 segundotan.
