Gaur hasiko da Nazioarteko Gitarra Jaialdia
24. edizioa da aurtengoa, eta gaurtik igandera luzatuko da. "Maila altuko" kontzertuak izango dira, nazioarteko gitarristek eskainitakoak.
“Altxor kaxa bat”, horrela deskribatu du Ortzi Alonso Kultur zinegotziak Hondarribia-Peñiscola Nazioarteko Gitarra Jaialdia. Carles Ponsekin batera, gitarra klasikoaren jaialdiko zuzendaria, aurkeztu dute 24. edizioa. Gaur hasiko da jaialdia, eta igandera arte luzatuko da. Kontzertu gehienak Hondarribian izango dira, baina badago baten bat Irunen eskainiko dena. Ponsek eskerrak eman nahi izan ditu, 24 urte ez baitira aldiro betetzen, eta lankidetzan oinarritutako jaialdia izanik, pisu handia du udalak emandako laguntzak.
“Urtero zerbait ezberdina egiten saiatzen gara. Aurten, Hondarribiko Musika eta Dantza Eskolarekin elkarlan bat abiatu dugu, bertako gitarra ikasleekin eta irakasleekin”. Atzo, ikasleei zuzendutako masterclass bat eskaini zuen Ponsek, eta gaur, klase horiekin amaitzeko, kontzertu bat emango du Kultur Etxean, 19:00etan.”Ostadarraren soinuak izango da kontzertuaren izenburua. Errepertorio anitza izango da. Tango argentinarrak izango dira, eta Isaac Albenizekin amaituko dut”. Bihar, hirukote frantses batek eskainiko du bere kontzertua, Kultur Etxean baita ere. Igor Kiritchenko (Cello) Frédéric Bernard (Gitarra) eta Eric Franceries (Gitarra) izango dira oholtzan, “pieza oso esanguratsuak” jotzen.
Ostiralean Mattia Dugheri gitarrista italiarrak hainbat pieza interpretatuko ditu. “Musikari gaztea da, oso gaztea. Lehenengo aldiz entzun nuenean argi eta garbi pentsatu nuen Hondarribira ekarri behar genuela”, esan du Ponsek. Zuzendariak adierazi du talentu gazteak erakartzea garrantzitsua dela, hemendik urte batzuetara, “agenda eta aurrekontu” aferengatik, “zaila” izango delako.
Larunbatean Hondarribiko Musika eta Dantza Eskolako gitarra ikasleek eta irakasleek hartuko dute protagonismoa. Gitarra orkestrak, Ana Albanekin eta Fabian Alvarezekin batera joko du, azkena irakaslea izanik. Ixkay Duo bezala ezagutzen dira Alban eta Alvarez, eta hainbat kontzertu eman dituzte Espainian, Ekuadorren eta Mexikon. Gitarra orkestrak lau abesti euskaldun joko ditu, eta ondoren, Ixkay Duok kontzertu zabalago bat eskainiko du, nazioarteko, bereziki Hego Amerikako, hainbat konpositoreren kantekin. 19:00etan izango da kontzertua, Kultur Etxeko areto nagusian.
“Maila altua”
Irunen Oiasso museoan egingo dute kontzertua. 12:00etan, Manuel Toucinho eta Pedro Rufino gitarra jotzaile portugaldarrak eskainiko dute emanaldia. “Fadoa ez den baina antzekotasun asko dituen musika joko dute biek”. Azkenik, Hondarribiko Paradorean izango da azken kontzertua, egin izan duten moduan. “Antonio Molfetta izango dugu azken kontzertuan. XX. mendeko musika erromantiko eta neoklasikoa entzun ahal izango dugu, hala nola Tarrega, Joaquin Rodrigo edota Turina”.
Ponsen ustez, programazio anitza baina maila altukoa da gaur hasiko dena. “Denak oso onak dira, eta uste dut jendeak disfrutatuko duela. Denontzako zuzendutako kontzertuak dira, musikaz eta gitarraz disfrutatzekoak”. Sarrerak muxutruk dira, eta Kutxabank web ataritik lortu daitezke, baina era fisikoan lortzeko Arma Plazan hartu beharko dira. Oiasso museoko kontzertuak museoko webgunean izango dira.
