Folkesi eta Wonka y Waje 4LEB talde handiekin batera, sanmartzialetan
Gaur aurkeztu dituzte aurtengo bi talde teloneroak zeintzuk izango diren, ekainaren 13an eta 20an izango dira Urdanibia plazan.
Gaur aurkeztu dituzte aurtengo sanmartzialeatko jaien talde teloneroak. Egunotan, lau talde finalisten artean bozkatzeko aukera izan dute irundarrek, eta dagoeneko argitu dute aurtengo bi talde aukeratuak zeintzuk diren. Guztira 1.000 boto jaso dira. Folkesi eta Wonka y Waje 4LEB taldeak Gozategi eta Bele taldeekin batera igoko dira Urdanibia plazako eszenatokira ekainaren 13an eta 20an, hurrenez hurren.
Eszenatokira igotzen lehenak Folkesi taldea izango da, eta Gozategi taldearekin elkarbanatzeko aukera izango dute. Folk musika estiloko talde honek Gwendal, The Pogues, Sorotan Bele, Celtas Cortos edo Mago de Oz taldeen eragina duten abestiak interpretatuko dituzte.
Ekainaren 20an, berriz, Bele taldea eszenatokira igo baino lehen, Wonka y Waje 4LEB taldearen txanda izango da. Iaz sortu zuten rap estiloko taldea, eta dagoeneko kolaborazio eta kontzertu batzuk egin dituzte.
“Bi taldeentzat funtsezko bultzada izango da beren proiektuak hazten sendotzen jarraitzeko”, adierazi du Alzagak.
