Belaunaldien arteko elkartasun eguna ospatzeko hainbat jarduera antolatuko dituzte
Asteazkenean, hilak 29, Belaunaldien Arteko Elkartasun eta Lankidetzaren Europako Eguna ospatuko dute eta horren baitan egitaraua aurkeztu dute.
Giza Eskubideen, Memoria Demokratikoaren eta Garapenerako Lankidetzaren arloak eta Gizarte Ongizateko eta Berdintasuneko arloak Belaunaldien arteko elkartasun eta lankidetzaren eguna ospatzeko hainbat jarduera antolatu dituzte asteazkenerako. Apirilaren 29an, Plaiaundi Institutuko areto nagusian hitzaldi bat antolatuko dute, 11:30ean hasita. Egungo egoera soziala landuko dute: teknologiak harremanak nola eraldatu ditu? galderari erantzunez. Arrakala digitalak komunikatzeko eta parte hartzeko moduak aldatu ditu, eta horren baitan, teknologiak duen rolaren gaineko gogoeta kritikoa egingo dute.
Jardunaldiak helburu hauek izango ditu: teknologiaren aukerak eta arriskuak aztertzea, herritarrek komunitatearen eraikuntzan duten rol aktiboa indartzea eta gazteek beren gaitasun digitalak partekatzea adinekoek beren bizi esperientziak partekatzeko aukera izan dezaten.
“Normalean, arrakala hau belaunaldiak banatzen dituen elementua da: gazteek arazorik gabe moldatzen dira ingurune digitalean; adineko pertsonak, ordea, zalantzatiagoak izan daitezke, deskonfiantza dutela edo baztertuta daudela senti dezakete”, adierazi du Gorka Alvarez udaleko bozeramaile jeltzaleak. “Helburua da belaunaldien arteko lankidetzaren inguruan sentsibilizatzea, garapen sozialerako eta kohesiorako tresna izatea”, gaineratu du Josu Iguiñizek, Gizarte Ongizateko ordezkariak.
Bestalde, arratsaldean bi jarduera antolatuko dituzte, 17:30etik aurrera. Batetik, Irungo Musika Eskolako ikasleek kontzertu bat eskainiko dute Kateako Adinekoentzako gunean. Sarrera librea izango da, aretoa bete arte. Ordu berean, Sonia Ruiperezek belaunaldien arteko josketa tailerra egingo du. Bertan parte hartzeko izena eman beharko dute interesdunek. Bi jarduera hauek gazteentzat zein helduentzat izango dira, bi belaunaldien arteko zubia sortzeko eta biek elkarrekin ikasteko.
