Ahazteko asteburua izan du Txingudi Errugbi taldeak
Harrobiko taldeek asteburu txarra izan zuten, 16 urtez azpikoek garaipena esku eskura izan zuten azken jokaldira arte (28-26).
Denboraldia amaitzeko aste gutxi besterik ez dira geratzen. Emakumezko zein gizonezko talde nagusiek denboraldia amaitu badute ere, harrobiko taldeek partidak izan dituzte. Ahazteko partidak izan dira, gainera.
16 urtez azpiko Txingudi/Baztan/Orereta taldeak Gaztediren aurkako partida izan zuen Gasteizen. Lehia oso estua izan zen, baina ezin izan zuten garaipena eskuratu. Azkenengo jokaldian Gaztedik partida erabaki zuen (28-26). Porrot honekin azken faseko kanporaketara sailkatzeko aukera galdu du Txingudiko taldeak. Maiatzaren 9an, sailkapeneko bosgarren postua erabakitzeko partida izango dute Hiruherriren aurka, Plaiaundin.
18 urtez azpikoek porrot gogorra jaso zuten. Uni Bilbok nagusitasunez jokatu zuen Gabiria Txingudi/Baztan taldearen aurka, Plaiaundin. Lehenengo minututik bilbotarrak nagusi izan ziren, eta atsedenaldirako 62 puntu lortu zituzten. Txingudikoek, berriz, ez zuten puntuak lortzeko aukerarik izan. Bigarren zatian ere nagusitasunez aritu zen Uni Bilbo. Azkenean, 7-100 markagailuarekin amaitu zen norgehiagoka. Asteburu honetan, ez dute jardunaldirik izango; eta maiatzaren 9an, lehiara bueltatuko dira. Gabiria Txingudi/Baztanek La Unicaren aurkako lehia izango du, Iruñean.
Tokata taldeak plakajerik gabeko errugbiaren topaketa izan zuen Senperen (Lapurdi). Jardunaldia bikaina izan zen, eta dagoeneko hurrengoan pentsatzen ari dira. Hurrengo hitzordua Logroñoko Pradoviejo zelaian izango da, maiatzaren 9an. Eskolako taldeek, aldiz, Errenterian jokatu zuten Gipuzkoako Federazioak antolatutako topaketan. Orereta, Bera Bera, Ordizia, Iruña eta Arrasate taldeen aurka jokatu zuten Beraungo Mikel Odriozola estadioan.
