Udalak prebentzio protokoloa aktibatu du Opilaren Egunerako
Bihar, hilak 25, San Marko egunarekin bat eginez, jendetza espero da San Martzialen egingo den erromerian.
Bihar, hilak 25, urteko egun handietako bat biziko dute ehunka irundarrek San Martzialen. San Marko eguna edo Opila Eguna jai giroan ospatzeko eguna izan ohi da, eta testuinguru horretan, udalak alkohol eta droga gutxiago kontsumitzeko prebentzio zerbitzua jarriko du. Protokoloa 10:00etatik 20:00etara bitarte martxan izango da, erromeria egingo den eremua zaintzeko. Honela, istiluak saihestu, jende kopurua kontrolatu eta adingabeek alkoholik sartzen ez dutela bermatuko dute. Udalak gogora ekarri du adingabeek guztiz debekatuta dutela alkoholaren kontsumoa, Jarri frenoa alkoholari. Guztion ardura da.
Udaltzaingoekin batera, Babes Zibileko langileak ere jende kopuru handia biltzen den eremuetan izango da. San Martzialeko aparkalekuak kudeatuko dituzte eta Blaia udal hilerrian eta Ibarla eremuan izango dira lanean.
San Martzialen ez ezik, Guadalupeko zelaietan ere jendetza biltzea espero dute. Hori dela eta, doako autobus-zerbitzu berezia jarriko dute bi tokitara, ibilgailu partikularren erabilera murrizteko. Bi linea eskainiko dituzte egun osoan zehar: 10:00etatik 14:00etara eta 16:00etatik 20:00etara, ordu erdian behin. San Martzialeko linea Hondarribia kaletik hasiko da. Kolon pasealekuan, Nafarroa hiribidean eta Artian geldialdiak egingo ditu San Martzial mendira igo baino lehen. Guadalupera doan lineak, berriz, Dunboako anbulatorioa, Nafarroa hirribidea, Kolon pasealekua, Hondarribia kalea eta Pinudi zeharkatuko ditu Guadalupera igo aurretik.
