Kubarako material bilketa egingo dute Kabigorrin
Apirilaren 30ean eta maiatzaren 1ea, 2an, 7an, 8an eta 9an materiala jasoko dute 19:00etatik aurrera Euskadi-Kuba elkartearen bidez.
Kuba jasaten ari den blokeo “anker eta basatiaren gorakadaren” aurrean, Euskal Herria-Kuba elkarteak material bilketa ugari egin ditu azken asteotan hainbat lekutan. Argia eta indarra Kubarentzat, blokeoren aurka, indarra Kubarentzat! kanpainaren baitan, apirilaren 30ean eta maiatzaren 1ean, 2an, 7an, 8an eta 9an material bilketa egingo dute Kabigorrin, 19:00etatik aurrera. Herritarrei dei egin diete elikagaiez gain, material sanitarioa, kirol materiala eta eskolako materiala ere eramateko.
Bestalde, Euskal Herria-Kuba ekimenak eta Euskadi – Cuba elkarteak bultzatuta, 180.000 euro bildu dituzte azken hilabetean. Lortutako dirua eguzki-energia fotovoltaikoko instalazio oso bat erosteko eta bidaltzeko erabiliko da. Honekin, Habanako William Soler Unibertsitate Ospitale Pediatrikoko Poliklinikoari autonomia elektrikoa emango diote.
180.000 euro lortu badira ere, helburua 244.000 eurotara iristea da. Diru honekin, Habanako ospitale horretako ospitalizazio-eremuan bigarren instalazio baten inputak estaliko dituzte. Egoitza Suitzan duen eta Europako hamahiru estatutako kolektibo solidarioek babesten duten mediCuba-Europa GGKEak hartuko du bere gain instalazioa.
Kanpaina honetarako dohaintzak egiteko: Euskadi-Cuba – ES35 3035 0134 43 1340059271 (Laboral Kutxa) edo Bizum (04713 kodea).
