Irungo bi familia etxegabetze arriskuan daudela salatu du Stop Kaleratzeak plataformak
Atzo agerraldia egin zuten Donostiako Bulebarrean, etxegabetze demanda jaso duten familietako bi Irungoak dira.
Donostiako Bulebarrean egin dute agerraldia. Stop Kaleratzeak plataformak agerraldia egin zuen atzo, hilak 23, Donostiako Bulebarrean, bost familien etxegabetze demanda salatzeko. Bost dira azken hilabetean etxegabetze arriskuan dauden familiak, eta horietako bi Irungoak dira. Elkarretaratze jendetsua izan da, eta argi adierazi zuten bost familien etxegabetzeak bertan behera utz ditzaten.
Agerraldian, Kutxabankek eta Testa-Blackstone putre-funtsak etxegabetzearekin aurrera egiteko erabakia salatu dute. Otsailean, PPk, VOXek eta Juntsek Espainiako Kongresuan “ezkutu soziala” atzera bota zuten. Horren ondorioz, zaurgarritasun egoeran dauden familiek “ez dute babes sozialik” eta egun batetik bestera etxegabetuak izan daitezke 2026an.
Etxegabetze arriskuan dauden Irungo bi familiek zaurgarritasun egoeran daude, epaile batek hala ziurtatuta. Batetik, Lorenaren kasuan, etxebizitza alternatiboa izatea eskatu du Rosa Garcia, Stop Kaleratzeak plataformaren bozeramaileak. “Kutxabankek Lorena eta bere bost seme alabentzat alokairu sozialeko hitzarmena zazpi urterako onartzea eskatzen dugu, eta etxebizitza alternatiba izatea eskatzen dugu”.
Beste alde batetik, Houda eta bere lau seme-alaba ere etxegabetze-arriskuan daude. “Ahozko epaiketa” egin ondoren, etxegabetzea gauzatzeko data ekainaren 10ean zehaztu dute. “Hori dela eta, ekainaren 9a baino lehen, Houda eta bere seme-alabak etxebizitza bat edukitzea exijitzen dugu”.
Gaur egun, Espainiako 60.000 familia babes sozialik gabe daude; eta gainera, Eusko Jaurlaritzak jakinarazi du aurten Gipuzkoako 8.019 familiari kontratua amaituko zaiela. Epaileek ez badituzte ezohiko luzapenak balioztatzen, kaleratze-arriskuan dauden familien kopuruak “izugarri” gora egingo duela adierazi du Garciak. “Soilik, Donostiako eta Irungo Udalek epaileek eskatutako zaurgarritasun txostenak bidali dituzte 2024 eta 2025 urteetan. Irunen, hain zuzen, 83 izan dira bidalitako txostenak”.
Apirileko soziometroaren arabera, etxebizitzaren afera arazo larriena da herritarrentzat. “Eusko Jaurlaritzari, Etxebizitza Kontseilaritza eta udalei eskatzen diegu berehalako neurri zorrotzak eta ausartak har ditzala eskatzen dugu, eta beste aldetik, bankuei eta putre funtsei etxegabetzeekin gelditzea exijitzen diegu”.
“Martxoan, Errenteria-Oreretan egin genuen bezala, Irungo familien eta kaltetutako beste familien etxegabetzeak geldiaraziko ditugu”.
