Taxiak WhatsApp bidez eskatzeko aplikazioa, martxan
Gipuzkoa Taxi elkarteak aplikazioaren proba pilotua egingo du datozen egunotan, eta 943 47 00 47 telefonoa martxan jarri dute.
Gipuzkoa Taxi elkarteak Donostialdea, Oarsoaldea eta Bidasoa eskualdeetan taxi zerbitzua hobetzeko dTaxi aplikazio bat martxan jarri du. WhatsApp-aren bitartez, taxiak eskatzeko aukera izango dute erabiltzaileek, hain zuzen, 943 47 00 47 telefonoaren bidez. Datozen egunotan, aplikazioaren proba pilotua martxan jarriko dute hiru eskualdeotan. WhatsApp kanalaz gain, proiektuak webgune informatibo bat ere edukiko du taxiak eskatzeko eta zalantzak argitzeko.
Aplikazioak taxia zerbitzu gehigarririk gabe eskatzeko aukera eskainiko du, modu errazean, intuitiboan eta hainbat hizkuntzatan. Eskaerak euskaraz, gaztelaniaz, ingelesez eta frantsesez egin ahal izango dira. Hori gutxi ez, aplikazioaren bitartez ibilgailuaren kokapena, iristeko aurreikusitako denbora eta bidaiaren gutxi gorabeherako prezioa denbora errealean jakiteko aukera izango dute erabiltzaileek.
«dTaxik zerbitzuaren berehalakotasun-, irisgarritasun- eta gardentasun-eskaera gero eta handiagoari erantzuten dio, beti ere, taxiarekiko interakzioa zuzenago eta egungo komunikazio-ohituretara egokitzen», adierazi du Goyo Alias Gipuzkoa Taxiko presidenteak. Aplikazioak herritarrak erdigunean jartzen ditu, mugikortasun eredu eraginkorrago, hurbilago eta irisgarriago baterantz aurre egiteko. Fase pilotua izanik, erabiltzaileei eskatu diete aplikazioaren funtzionamendua probatzea eta horren gaineko feedbacka biltzea.
