Kubarako bilketa solidarioa egingo du Bidasoko Kontseilu Sozialistak
Bidasoko Kontseilu Sozialistak eta Ikasle Antolakunde Sozialistak Kubarako material bilketa egingo du larunbatean, hilak 25, hainbat tokitan.
Ugariak dira Euskal Herriaren eta Kubaren arteko elkartasun keinuak, eta horren adibide da Bidasoko Kontseilu Sozialistak eta Ikasle Antolakunde Sozialistak antolatu duten material bilketa. Aste honetan zehar, Blokeo inperialistaren aurrean, Kubarekin elkartasuna! lelopean, Irungo hainbat ikastetxeetan bilketa egiten ari dira. Hala nola, Pio Baroja, Hirubide, Txingudi, Toki Alai eta Eguzkitza institutuetan jasoko dituzte produktuak. Larunbat goizean, hilak 25, Irungo Fermin Calbetonen, Alcampon eta Hondarribiko Eroskin egingo dute bilketa, 10:00etatik 14:00etara.
AEBk azken urteetan Kubaren aurkako eraso inperialistak biziagotu dituzte, politika isolazionista eta kriminala azken muturreraino eramateko prest dago Donald Trumpen gobernua. Itzalaldiak, erregaiaren gabezia, ura eta elikagaiak eskuratzeko zailtasunak, kalteak osasungintzan eta hezkuntzan… jasaten dute bertako herritarrek. Egoera larriaren aurrean, elikagaiak, higiene materiala, kirol materiala, material sanitarioa eta garbitzeko materiala bilduko dute.
Elikagai ez galkorrak (aleak, arroza, zereala, lekaleak, pasta, fruitu lehorrak, olioa, tomatea), mota guztietako produktu sanitarioak, medikamentuak, elikadura osagarriak (bitaminak, mineralak, probiotikoak), haurrentzat eta helduentzat higiene materiala, baloiak, bizikletak, pilotak, ikasmateriala (testu-liburuak eta entziklopediak ez), erratzak, oihalak, biberoien garbitzailea eta fregonak eramateko eskatu dute. Jendea animatu nahi izan dute bilketan parte hartzea, eta ahalik eta material gehien biltzea.
