EAJk positibotzat jo ditu Irungo osasun arreta hobetzeko aurrerapenak
Eusko Jaurlaritzako Osasun sailak Oinaurreko osasun-zentroa eraikitzeko eta pediatria zerbitzua hobetzeko aurrerapausoak eman ditu.
Irun Erdialdeko anbulatorioa. Eusko Jaurlaritzako Osasun sailak Bidasoko osasun arreta hobetzeko aurrerapausoak iragarri zituen, eta horren harira, Irungo EAJk oso positibotzat jo ditu egindako aurrerapenak. 2024ko martxoaren 21eko ohiko Osoko Bilkuran, EAJk proposatu zuen udal lokalak Eusko Jaurlaritzari lagatzea; baina Irungo Sozialistak, Elkarrekin-Irun-Podemos, Irungo EH Bildu eta Talde Popularra ezezkoa bozkatu zuten. Orain, ordea, egoera oso bestelakoa da. Plan Funtzionala onartu ondoren, Tokiko Gobernu Batzordeak Alardeko lokalak lagatzea onartu du, datozen hamar urteetarako.
“Proposamen hori erdialdeko anbulatorioa husteko eta behin-behineko neurri gisa pediatria indartzeko helburuarekin sortu zen, hiriko erdialdean osasun-zentro berri bat eraiki arte. Talde guztiek errefusatu zuten, baina egiaztatu dugu neurri eraginkorra eta beharrezkoa dela Bidasoaldeko Osasun Laguntzarako Plan Integrala aplikatu arte”, adierazi du Gorka Álvarez udaleko bozeramaile jeltzaleak.
Erdialdeko Irun Berria osasun-zentroa diseinatzen ari dira. Biharko apirileko ohiko Osoko Bilkuran, Oinaurreko anbulatorioa eraikitzeko lursailen beste lagapen garrantzitsua onartuko dute. “Badakigu asko dagoela egiteko, lanean jarraituko dugu, eta Bidasoa 2025-2035 ESIaren Plan Zuzentzailearen hedapen eraginkorrarekin aurrera egiten jarraitzea eskatuko dugu, diskrezioz eta erantzukizunez”, gaineratu du. “Hau da bidea eta bertan jarraituko dugu gaur egun hirian ditugun gobernu arduretatik”.
EAJk Bidasoa eskualdeko osasun egoeraren eta herritarren kezkaren jakitun, irtenbide errealen bilaketak suposatzen duen denbora eta plangintza nabarmendu ditu. “Osasun Saila egiten ari den lana aitortu nahi dugu, ildo horretan jarraitzeko eta herritarren eskaerei erantzuteko”.
