Abotsanitz eta PSE-EE, Mendeluenearekin pozik
Mendeluk eraikina merezi zuela diote bi alderdiek, baina PSE-EEk azpimarratzen du konpromiso politiko totala behar duela auzoak.
Mendeluenearen irekierak hedabideen foku asko jaso ditu, eta herrian ahoz aho zabaldutako berria izan da. Hondarribiko Udalaren ekimenez ireki da eraikina, eta udala osatzen duten alderdi politiko batzuk hortaz mintzatu dira. Abotsanitz eta PSE-EE ados agertu dira.
Herri batzarrak ospatu egiten du Mendeluenearen irekiera. “Espazio hori, erreferente bilakatu daiteke gizarte kohesiorako, bai eta auzoen dinamizaziorako ere. Eraikin honek argi erakusten du zerbitzu publikoak auzoen bihotzera hurbiltzeko apustu sendoa, hiriaren komunitate-bizitza indartzeko asmoarekin”, adierazi du Abotsanitzek ohar bidez.
Udal gobernuko udal taldearentzat Mendeluenea “herritarren bizi kalitatea hobetzeko bideratutako politika publikoen adibide” bihurtu da, “komunitate loturak indartuz”. Abotsanitzek gogorarazi nahi izan du 2025eko martxoako udalbatzan EAJk Opengelaren aurka bozkatu zuela. “Harridura handia eragin zigun orduan, baina boto horrek abiatu zuen ondoren oposizioan eramandako ezetzaren politika, auzokideekiko sentsibilitate falta erabatekoa eta alderdiaren interesa, interes orokorra eta ongizate kolektiboaren gainetik jartzen dituen jarrera agerian utziz”.
Herri batzarraren ustez, EAJren agintaldietan bazter batean gelditu zen Mendelu, eta “horren adibide dira” Mendelu ere Hondarribia da leloak, auzoan zehar ikusi daitezkeenak. “Mendelu auzoak oso beharrezkoak dituen zerbitzuen garapenerako oztopoa izan zen EAJren kontrako botoa”. Orain, Mendeluenearen irekierarekin, uste dute zor historiko bat “kitatu dela”, ba9n oraindik bide luzea dagoela egiteke.
Herritarrak erdigunean jartzen dituzten politika publikoekiko duten konpromisoa berretsi nahi izan du Abotsanitzek. “Auzotar guztiak gonbidatzen ditugu espazio berri hau bere egitera eta bertako jardueretan modu aktiboan parte hartzera”.
PSE, ados, baina eskaerekin
PSE-EEk ere positibotzat jo ditu Hondarribiko Udalak egindako erosketa eta zahar berritze lanak, ondoren Mendeluenea irekitzeko. “Opengelaren proiektua irekitzeko beharrari dagokionez, Eusko Jaurlaritzako Lurralde Antolamendu eta Etxebizitza Sailaren laguntzarekin bultzatutako proiektua da, auzoaren zuzkidura-beharrei erantzuteko helburuarekin”, adierazi dute sozialistek.
PSEk argi du urrats garrantzitsua dela mendeluarrentzat, “administrazioa herritarrengana hurbiltzeko eta hiri hobekuntzako eta birgaitzeko prozesuak errazteko apustuaren emaitza baita”. Hala ere, sozialistek adierazi dute ekipamenduaren eta bere funtzionamenduaren inguruko informazioa falta dela, eta hori bera deitoratu diote udal gobernuari.
“Ezin dugu ahaztu Mendeluk esku-hartze integrala behar duela”, adierazi dute sozialistek, eta hainbat gai zerrendatu dituzte, hala nola “etxebizitza batzuen egoera, zonaldeak jasaten duen trafiko handia, uholde-arriskua eta urteetan garapena baldintzatu duten zailtasunak”. Hainbat udalbatzetan Mendeluren inguruko proposamenak egin izan ditu PSEk, eta beti defendatu izan dute Mendelun konpromiso politikoa behar dela, ez jarduera isolatuak.
