Aldundia eta Gurutze Gorria, elkarlanean gizarte bazterkerian daudenen alde
MUGI txartelak eta haren finantzazioak bere hartu ditu aldundiak, gizarte bazterkerian daudenen pertsonei zuzenduak. Azken denboran 278 pertsonek erabili dute zerbitzua.
Gipuzkoako Foru Aldundiak Gurutze Gorriarekin elkarlanean jarraitzen du, gizarte bazterkeria egoeran dauden pertsonek garraio publikoan sarbidea izan dezaten. Horregatik, gaur, Azahara Dominguez diputatua Hondarribiko Gurutze Gorrian izan da, Igor Enparan alkatearekin batera. MUGI sistemara sartzeko oztopoak murriztea eta aukera berdintasuna sustatzea da planaren xedea. Bisitan erakundeko arduradunekin eta onuradun batzuekin bildu ahal izan dira, eta garraio publikorako sarbide unibertsala bermatzearen garrantziari buruzko iritziak trukatu dituzte.
Lankidetzaren ondorioz, Aldundiak MUGI txartel anonimoak erosten ditu, eta haien kargak finantzatu. Gurutze Gorriak bere programen bidez artatzen dituen pertsonen artean banatzen dira Aldundiaren esku dauden txartel horiek. SOS Arrazakeria, Sarea Fundazioa, Zehar Errefuxiatuekin eta Caritas elkarteei ere ematen zaizkie laguntzak. “Garraio publikoa oinarrizko eskubidea da, eta beste eskubide batzuetarako sarbidea errazten du, hala nola osasun-arreta, hezkuntza, enplegua edo aisialdia”, gehitu du Dominguezek.
Azken denboretan 278 pertsonek erabili dute aipatutako zerbitzua, Antxon Amunarriz Gurutze Gorriaren Gipuzkoako ordezkariak azaldu duenez. “MUGI txartelak Gurutze Gorriaren Harrera eta Gizarteratze Programa indartzen duen tresna dira, eta aukera ematen dute eragin handiagoarekin esku hartzeko muturreko zaurgarritasuneko eta ohiko bizitegi-bazterketako testuinguruetan. Horrek erabiltzaileen autonomia eta mugitzeko askatasuna errazten ditu”, nabarmendu du Amunarrizek
“Gizarte kohesionatuagoa”
Azkenik, diputatuak esan du gaur egungo testuinguruan, “non diskurtso xenofoboak eta arrazistak ikusgarritasuna eta presentzia irabazten ari diren eztabaida publikoan”, Gipuzkoan “apustu sendoa” egiten dela “gizarte kohesionatuagoa, inklusiboagoa eta solidarioagoa” eraikitzeko, non “guztiok tokia izango duten”. Horrek berekin dakar “aukera-berdintasuna sustatuko duten politikak eta ekintzak bultzatzea”, gaineratu du.
