1,3 milioiko inbertsio sorta anitz bat proposatu du EAJk
Javier Ugarteko aparkaleku proiektua, kirol instalazioetan inbertsioak, erakusketa areto irisgarri bat... hainbat proposamen berri egin ditu alderdi jeltzaleak, 2026ko aurrekontuetan ireki diren aukera berriei begira.
Hurrengo denborei begira, EAJk inbertsio sorta berri bat proposatu du udalean. EAJk udal gobernuari eskatu dio aprobetxa dezala 2025eko aurrekontuaren likidazio dekretua sinatu ondoren 2026ko aurrekontuan kreditu berriak txertatzeko.”Udal taldeak defendatzen du oraindik badagoela proiektu bideragarriak aurrekontuan txertatzeko tartea, eta datorren urtean ekimen berrien geldialdia saihesteko aukera”, adierazi dute jeltzaleek.
Azaroan tramitatu ziren aurtengo aurrekontuak, eta EAJk esan du garai haietan hainbat proposamen egin zizkiola udal gobernuari, ondoren ez zirenak kontuan hartu. “Aurrekontu aukera berri honekin, hiriarentzat eta herritarrentzat garrantzitsuak diren jarduketak berreskuratzeko unea da, horrela ekimen berririk gabeko urte bat galtzea saihesteko. Orain proiektu berriak martxan jartzen ez badira, datorren urtean ekimen garrantzitsurik gabe geratzeko arriskua dago”.
1,3 milioi euroko inbertsio sorta proposatu du EAJk. Hainbat arlotako proposamenak dira. Hona hemen, zehazki, proposatutakoak:
Hiri hobekuntza eta mugikortasuna
• Javier Ugarteko aparkaleku proiektua: 150.000 €
• Harategi, Satarka kalea eta Gipuzkoa plaza berritzeko proiektua: 75.000 €
• Sabino Aranan markesina berriak: 60.000 €
• Gurpil-aulkian doazen pertsonen irisgarritasuna hobetzeko oinezkoentzako
pasabideetan espaloien beherapenak: 50.000 €
• Hondartzako gabarroia berritu eta denboraldi honetan bertan jartzea: 50.000 €
Espazio publikoa eta mantentze-lanak
• Auzo-bideetan inbertsioa: 300.000 €
• Guadalupeko mahai eta bankuak berritzea: 35.000 €
• Udarako Guadalupeko behin-behineko ostalaritza zerbitzua martxan jartzea:
50.000 €
Kirol instalazioak
• Kirol instalazioetan inbertsioak: 300.000 €
• Hondartzako belar artifiziala berritzeko proiektua: 45.000 €
Ekipamenduak eta elkarteak
• Elkarteek udal lokalen erabilerari buruzko azterlana: 20.000 €
• Erakusketa areto irisgarri bat alokatu eta egokitzea: 60.000 €
Ondarea eta tokiko nortasuna
• Guadalupeko ermitako freskoak zaharberritzea: 75.000 €
• Parrokiako tximistorratza berritzea: 15.000 €
• Amaiurrekin senidetzearekin lotutako jardunaldi edo kultur ekitaldia: 15.000 €
