Euskarazko 20 film proiektatuko dituzte datozen hilabeteetan
'Zinema haur, gazte eta helduentzat' egitasmoaren baitan, apiriletik abendura bitarte euskarazko filmak proiektatuko dituzte Mendibilen.
Beste urte batez bueltan da Zinema haur, gazte eta helduentzat egitasmoa. Aurten, gainera, apirilaren 26an hasi eta abendura bitarte, euskarazko 20 film proiektatuko dituzte Mendibilen. Euskarazko kultur kontsumoa indartzeko egitasmoa, urte osora zabalduko dute. Orain arte, soilik hilabete batzuetan proiektatu dituzte filmak, baina aurten euskarazko kultur kontsumoa indartzeko egitasmoa luzatzea erabaki dutela adierazi du Josu Iguiñizek, Euskara ordezkariak. Sarrera doakoa izango da, gonbidapenen bitartez.
Hainbat generotako filmak proiektatuko dituzte, eta aurkezpenean azpimarratu dute gehienak 2024, 2025 eta 2026 urtean estreinatutako filmak direla. Haur eta gazteentzat ez ezik, helduek eta dibertsitate funtzionala duten pertsonek ere euskarazko filmez gozatzeko aukera izango dute. “Programari jarraipena emateaz gain, aurten, pelikula kopurua handitu eta areto zabalago batean eskainiko dugu, gazte gehiagori filmaz gozatzeko aukera emanez”, adierazi du Iguiñizek. Dibertsitate funtzionala duten pertsonentzako irisgarri egiteko, saio guztietan argi urdin leun bat jarriko dute eta bolumena puntu erdi bat jaitsiko dute.
Haur eta gazteen filmak 16:00etan proiektatuko dituzte; eta helduenak, aldiz, 18.00etan. Sarrera doakoa den arren, gonbidapenak eskuratu beharko dituzte. Proiekzio astean asteleheneko 14:00etatik ostiraleko 14:00ak arte eskuratu ahalko dituzte udal atarian, sarrerarik geratzekotan zinemako txarteldegian hartzeko aukera egongo da filma hasi baino orduerdi lehenago. Pertsona bakoitzak film bakoitzeko gehienez lau sarrera hartu ahalko ditu.
Hona hemen datozen hilabeteotan proiektatuko dituzten filmen egitaraua:
Haur eta gazteentzako filmak (16:00etan)
– Apirilak 26: Kayara. Inka gerraria (2025).
– Maiatzak 10: Tigre galdua (2025).
– Maiatzak 17: Sablehortz kapitaina eta Greleko kondesa (2025).
– Ekainak 7: Looney Tunes, Lurrak eztanda egin zuen eguna (2024).
– Ekainak 14: Superheroein familia (2022).
– Ekainak 21: Baba Yaga eta sorginkerien liburua (2026).
– Irailak 20: Izurde Mutikoa (2022).
– Irailak 27: Sari Nagusia Ziztu Bizian (2025).
– Urriak 4: Chirp, Honey Hillseko ikertzailea (2026).
– Urriak 25: Barrakundearen altxorra (2025).
– Azaroak 15: Hartz-atzapar kanpamendua (2025).
– Azaroak 22: Ochiren legenda (2025).
– Abenduak 13: Oilaskoerbia eta Marmokaren sekretua (2026).
– Abenduak 27: Supercharlie (2025).
– Abenduak 29: Dragoi-jagolea (2024).
Helduentzako filmak (18:00etan)
– Maiatzak 24: Gaua (2025).
– Irailak 13: Lurdes Iriondo. Ez gera alferrik pasako (2025).
– Urriak 18: Azken erromantikoak (2024).
– Azaroak 8: Dekoratua (2025).
– Abenduak 20: Kantauri (2025).
