Erdi Aroko pintxo lehiaketarako izen ematea, irekia
Apirilak 30era arte izango dute epea irekita izena eman nahi duten tabernek. Soilik Erdi Aroan erabiltzen ziren osagaiak erabili ahalko dituzte.
Erdi Aroko pintxoak bihartik eskuragarri. Beste urte batez egingo dute Erdi Aroko Pintxo Lehiaketa, eta jada irekita dago izen ematea. Apirilaren 30era ate egongo da izen ematea irekia. “Ekimenaren helburua tokiko sormen gastronomikoari balioa ematea eta Hondarribiko ostalaritza-eskaintza sustatzen jarraitzea da”, azaldu du Hondarribiko Udalak, ohar bidez.
Lehiaketak badu ezaugarri berezi bat: pintxoak Erdi Aroan Iberiar penintsulan zeuden osagaiekin egin daitezke soilik, hala nola, garia, esnea, arrautzak, haragia, arraina, perretxikoak eta olioa bezalakoak. “Ohi bezala, ezingo dira Amerika aurkitu ondoren iritsitako osagaiak erabili, hala nola patata, tomatea, artoa, piperra edo txokolatea. Epaimahaiak bereziki baloratuko du bertako produktua erabiltzea.
Taberna edo jatetxe bakoitzak pintxo bakarra aurkeztuko du lehiara. Bi sari banatuko dira. Lehena Herri Epaimahaiaren saria, 200 eurokoa, “Erdi Aroko Pintxoaren Astean publikoaren boto gehien jaso dituen pintxoarentzat”. Bigarren saria, Erdi Aroko pintxo onenarena izango da, 300 eurokoa. Azken hori epaimahai profesional batek emango du, eta Hondarribia ordezkatuko du Valencia de Alcantaran egingo den Erdi Aroko pintxo lehiaketan.
Maiatzaren 29tik ekainaren 7ra eskainiko dituzte tabernek haien pintxoak. Egun horietan, herritarrek proposamenak dastatzeko aukera izango dute, eta noski, bozkatzekoa. Irabazleak ekainaren 10etik aurrera iragarriko dira.
