Asteburu honetan 1.400 txakur bilduko dira Ficoban
44. Nazioarteko Txakur Erakusketa antolatuko dute larunbatean eta igandean, eta 192 arraza izango dira erakusketan.
Ficoba jende ugari biltzeko topagunea den arren, txakurrek ere badute tokia. Asteburu honetan, 44. Nazioarteko Txakur Erakusketa antiolatuko dute Ficoban, eta larunbatean eta igandean, hilak 25 eta 26, 192 arrazatako 1.400 txakur bilduko dira. Gainera, 51. eta 52. Erakusketa Nazionalak izango dira, eta erreferentziazko ekitaldi gisa sendotzen ari da azken urteotan. Aurtengoa bi egunetakoa izango da, eta publikoak maila handiko lehiaketak zuzenean ikusteko aukera izango du.
Bi egunotan hainbat jarduera egingo dituzte txakurren obedientzia, erreskatea eta babes lana zenbatekoa den erakutsiko dute, besteak beste. Parte hartuko duten txakurren erdia Frantziatik etorriko dira. Epaileen artean ere, nazioarteko epaileak izango dira; hala nola, Erresuma Batuatik, Finlandiatik eta Frantziatik etorritakoak. Horrek erakusketak nazioartean duen izaera are gehiago indartuko duela ziurtatu dute antolatzaileek.
Bi egunetan, 09:30ean irekiko dute eta lehiaketari hasiera emango diote. 11:30etik 13:30era erakustaldia egingo dute, eta hura amaitzean gazte aurkezleen lehiaketa egingo dute. 16:00etan, berriz, talde finalak eta final handiak egingo dituzte. Hauek izango dira banatuko dituzten sariak: Erregearen Maiestatearen Saria, Birdbook eskaparelak eta kategoria bakoitzeko kopa, domina eta garaikurrak. Sari hauek erakusketarien lanaren, bikaintasunaren eta dedikazioaren sinbolo dira.
Erakusketa txarkurzaleen eta familien topagune izango da. Jardunaldian zehar, bisitariek atseden hartu eta taberna zerbitzua gozatzeko aukera izango dute. Maskotentzako osagarri eta produktu eskaintza zabala egongo da ere. Sarrera 5 euroan salduko dituzte, 10 urtetik beheroek, berriz, 3 euro ordaindu beharko dute. Gogorarazi dute Gipuzkoako Foru Aldundiaren araudiaren arabera ezin dela parte hartzen ez duten txakurrik sartu, ezta erakusketan txakurrik saldu ere.
