Alejandro de la Sotaren erakusketa, Emigrazio eraikin berrituaren lehen jarduera
Gaur, hilak 20, Emigrazio eraikinaren inaugurazioa egingo dute; eta erakusketa honen bidez, eraikinaren historia eta memoria azalduko dute.
1963 eta 1964 urteen artean, Alejandro de la Sota arkitektoak Irungo Emigrazio Eraikina eraiki zuen, eta urteetan zehar, udal ekipamenduen erreferente bilakatu da hirian. Irunvik birgaitze-lanak amaitu ditu, eta eraikinaren berezitasuna eta izaera mantentzea lortu dute. Gaur, hilak 20, birgaitutako Emigrazio Eraikinaren inaugurazio ekitaldia egingo dute, eta Alejandro de la Sota, arkitektoaren lana eta Irungo Emigrazio Eraikinaren historia erakusketa antolatuko dute. Bihartik, hilak 21, maiatzaren 3ra bitartean bisitatzeko aukera izango dute.
Eraikina Irungo hiri-ondarearen pieza nabarmena da, nahiz eta 90ko hamarkadan itxi behar izan zuten. Birgaitzeko esku hartze sakon baten ondoren, gaur irekiko dute San Migel auzoko beharrei erantzuteko ekipamendu publiko gisa. Erakina inauguratzen duen lehen jarduera izango da, eta XX. mendeko Espainiako arkitekturaren erreferentetako bat izan da. Arkitekturari dagokionez, hain berezia den eraikinaren bilakaera historikoa errepasatuko du udalak eta Alejandro de la Sota Fundazioak antolatutako erakusketak.
Espazio berriak hainbat zerbitzu sozial eta komunitario izango ditu. Eraikinak adinekoentzako lokala, haurtxokoa, liburutegia eta auzo-elkartearen egoitza izango du, auzoko bizitzarako topagunea sendotzeko. “Irunek bere egunerokotasunean eraikin historiko berri bat gehitzen du, ondareak hirian duen papera eta komunitate gisa gure eraikin enblematikoei eman nahi diegun balioa azpimarratu nahi duen inbertsio baten emaitza da”, adierazi du Cristina Laborda alkateak.
Xabier Arruabarrena arkitekto irundarra izango da erakusketaren komisarioa. Astelehenetik larunbatera irekiko dute, 11:00etatik 14:00etara eta 17:00etatik 20:00etara. Bihartik maiatzaren 3ra bitarte, zortzi bisita gidatu egingo dituzte asteburuetan, 11:00etan eta 12:00etan. Bisita gidatuetan parte hartzeko interesdunek izena eman beharko dute udal webgunean.
Historiaz betetako 2.268 metro karratu
50eko hamarkadaren amaieratik aurrera, atzerrira joaten ziren langileak hartzeko, orientatzeko eta prestatzeko baliabide gisa sortu zen. Irun Europarako igarotze-gune estrategikoa bihurtu zen, migrazio-fluxu handia zuen. Guztira 2.268 metro karratu ditu, eta 250 pertsona artatzeko eta 800 pertsonari otordu zerbitzua eskaintzeko gaitasuna zuen. Lehenengo urtean, adibidez, 26.000 pertsona baino gehiagok instalazioak erabili zituzten.
50eko hamarkadatik aurrera, lan-emigrazioak behera egin zuen Europan, krisi ekonomikoak eta kontratazio-politiken aldaketen ondorioz. Jatorrizko funtzioa pisua galdu zuen eta aldaketa horien ondorioz, 90 hamarkadan, eraikina itxi zuten.
Proiektuaren lehen fase honetan egindako inbertsioak eraikinaren zati baten barrualdea birgaitzea barne hartzen du. Aurretik aipatutako erabilera sozialetarako hainbat gela egokitu dituzte, baita kanpoko patio irekian bihurtu den eraikinaren urbanizazio osagarria ere, 3,1 milioi euroko inbertsioarekin. Eraikinaren sarbidea bi tokitatik egin beharko dute: Basurko eta Anaka kaleen arteko izkinatik eta Bartolome de Urdinso kaletik.
