Orain bai, herriak Mendeluenea ezagutu du
Inaugurazioa egin dute, eta musikaz alaitu giroa. Mendelueneako ateak irekiak egon dira eguerdian, eta dozenaka pertsonek zeharkatu dituzte ateak.
Orain bai, inauguratu dute Mendeluenea. Auzokideekin batera izan da, eta poztasun eta irribarre artean partekatu dute giroa. Duela hiru urte erosi zuen udalak Stanley akademia zena, herriari irekitzeko asmoarekin, eta azkenean, lortu dute. Gainera, irekiera handia egin dute, musika, eta jatekoa uztartuz. Kontzertuak izan dira bertan, eta ondoko La Luna tabernak eguerdiko mokadutxoa eskaini die bertaratutakoei.
Estitxu Urtizbereak hartu du hitza hasieran, bertakoei ongietorria emanez, eta Mendeluenea eraikinaren urratsak azalduz. Hori ez ezik, Mendeluko auzo elkarteko ordezkariak ere eskerrak eman nahi izan die auzoari eta udalari. Urteak daramatzate mendelutarrek aitortza bat eskatzen, eta honekin osotasunean betetzen ez den arren, aurrera pauso bat da auzotarrentzat. Orain, udaletxeko hainbat izapide bertan egingo dituzte, horrela BAZerainoko bidaia aurreztuz. Eta auzoan eta herrian eragiteko gelak izango dituzte eskura.
Irekiera zenez, musika ez da falta. Rondalla talde auzotarrez osaturiko taldea da, eta Mendeluenean ensaiatzen du. Hiru abesti interpretatu dituzte, jotekin giroa alaituz. Ondoren, Urtizbereak esan duen moduan, “Mendelu auzo anitza da”, eta bertan kokatzen da Psilocybenea elkartea. Psilocybeko Joxe Etxebestek beste hiru abesti eskaini ditu, azkenekoan bertaratutakoak berekin batera kantatzera gonbidatuz.
Mendelueneako ateak irekiak egon dira eguerdian zehar, eta dozenaka pertsona sartu dira hiru solairuetan, dena ikusteko xedearekin. Stanley zaharreko hainbat altzairu gorde egin dira, gela edo ikasgela funtzioa bertan mantentzen delako, baina badira ere berri berriak diren gelak.
Mendeluenearen funtzioak eta emandako urratsak jakiteko, hurrengo astean HITZAk erreportaje sakonago bat argitaratuko du.
Hona hemen gaurko argazkiak:
