Udal langileek lan baldintzak hobetzeko negoziaketak hastea eskatu dute
Udalhitzeko negoziazioa hasi bazituzten ere, udal langileek elkarretaratzea egin dute udaletxe aurrean lan baldintzak urgentziaz hobetzeko.
Gaur goizean, udal langileek eta Txinzerreko langileek elkarretaratzea egin dute.Gorka Correyero Llamas Irungo udal langileen haserrea nabarmena da garaiotan. Gaur, udal langileek lan baldintzak hobetzeko elkarretaratzea egin dute udaletxe aurrean, Txinzerreko langileek ere elkarretaratzearekin bat egin dute. Udalhitzeko negoziazioa duela urte eta erdi hasi bazen ere, EUDELek “eduki eskasak” jarri ditu mahai gainean. “Urte asko daramagu lan baldintzak hobetuko dituen akordiorik gabe”, salatu dute. Gaur gaurkoz, Irungo Udalak Madriletik datozen akordioak onartu ditu, “akordio horiek langile publikoen prekarizazioari eta pribatizazioari bidea irekitzen diote”.
Hori dela eta, ELAk eta LABek udal langileen lan baldintzen hobekuntza negoziatzea exijitu dute. Gaur egindako elkarretaratzeaz gain, apirilaren 23an bi orduko lanuztea egingo dute, 11:00etatik 13:00etara; eta maiatzaren 14an eta ekainaren 4an egun osoko grebak egingo dituzte EAEko udaletxe guztietan.
Lan baldintzen hobekuntzak adosteko hainbat aldarrikapen minimo adostu dituzte udal langileek. Lehenik eta behin, soldatetan azken urteetan galdutako eros ahalmena berreskuratzea, bai eta udaletan 1.500€ azpikontrataturiko langilerik ez egotea eskatu dute.”Enpleguari lotuta pribatizazio gehiagorik ez egitea, sektore feminizatuetan jardunaldiak %100ekoak izatea eta egiturazko lanpostuak aitortzea eskatzen dugu”.
Bestetik, Gazteberritze neurriak adostea eskatu dute, “adinagatiko lanaldia murrizteko eskubidea aitortzen duten neurriak soldata eta kotizazioak murriztu gabe”. Lan osasunaren arloan ere, hainbat neurri eskatu dituzte: bajen kudeaketa publikoa egitea eta ez mutualitateen bitartez, besteak beste. Soldata arrakalekin amaitzeko neurriak, jazarpen protokoloen jarraipena, LGTBIfobiaren kontrako protokolo eraginkorrak adosteko berdintasun neurriak ere eskatu dituzte.
Euskarari dagokionez, hainbat aldarrikapen egin dituzte. Lanpostu guztiak elebidunak izateko neurriak ezartzea; hala nola, egun lanean ari direnak euskalduntzeko euskara planak adostea eskatu dute. “Kontzialiatzeko neurriei dagokionez, batetik, zaintzeko lanaldi murrizketak eta eszedentziak adostea eta Loturagramen bidezko baimenak onartu eta aitortzea”, aldarrikatu dute.
“Udalhitzen zein udaletako negoziazioetan edukiak orain eskuratzeko modu bakarra da! Beraz, presionatu ditzagun alderdi politikoak langileoi dagokiguna eskuratu arte!”, amaitu dute gaurko elkarretaratzea.
