Izena eman daiteke datozen hilabeteotan Irunen egingo diren lasterketatan
Dagoeneko zabalik dago Irunen datozen hilabeteotan Irun 5k milia eta San Martzial igoeran parte hartzeko izen ematea.
Bidasoa Atletiko Taldeak datozen hilabeteotan antolatuko dituen lasterketak iragarri ditu, eta dagoeneko korrikalariek izena eman dezakete kirolprobak.com webgunearen bidez. Ekaina lasterketaz beteriko hilabetea izango da, eta Irun 5k milia lasterketa eta XLVIII. San Martzial igoera antolatuko dute.
Bost kilometroko lasterketa egin beharko dute ekainaren 7an, erdiguneko kaleetatik barrena. Adin guztietako pertsonak parte hartzeko jardunaldia antolatuko dute, eta zirkuitu homologatuko bost kilometroko lasterketaz gain, milia herrikoia, proba egokituak, haurrentzako lasterketak eta martxa solidarioa antolatuko dituzte. Izen ematea egiteko azken eguna ekainaren 5a izango da interneten bidez, probaren egunean bertan, izen emateko aukera ere izango dute. Lortutako diruaren zati bat Minbiziaren Aurkako Gipuzkoako Elkartearentzat izango da.
Bigarren hitzordua jai giroan izango da. San Martzialerako igoera egingo dute ekainaren 27an, larunbatarekin, eta jai giro bete-betean 3,6 kilometroko igoera egin beharko dute. 10:30ean, Urdanibia plazan hasi eta San Martzial ermitan amaituko da. Online izen ematea ekainaren 26ko 13:00ak arte zabalik egongo da, 12 euroan; egun berean ere izena emateko aukera izango dute, 16 euroan.
Bestalde, BATek jakinarazi du Hondarribian urtero antolatzen duten Guadaluperako Igoeran parte hartzeko izen ematea ere zabalik dagoela. Aurtengoa, 48. edizioa izango da eta Jostaldi pilotalekutik Guadalupeko Santutegirainoko malda igo beharko dute lasterkariek, 4,72 kilometro eta 182 metroko desnibela duen ibilbidean. Irailaren 5ean izango da proba, 10:30ean. Probaren bezperara arte, irailak 4, Kirolprobak webgunearen bitartez izena emateko aukera izango dute, 12 euroan. Probaren egunean bertan, 16 euro ordaindu beharko dituzte izena emateko. Helduen lasterketaz gain, Guadalupe Txikiaren proba ere antolatuko dute. Iaz ez zuten ospatu, eta aurten 1 eta 13 urte bitarteko haurrek Hondarribiko jaiei ongi etorria korrika eginez emateko aukera izango dute. Haurren izen ematea doakoa izango da.
