Etxebizitza eskuratzeko aukerak hobetzeko proposamen zehatzak egin ditu EAJk
Udal gobernuak egindako diagnostikoaren alde agertu dira, baina neurri zehatzak eskatu ditu alderdi jeltzaleak.
Etxebizitza Planaren harira egindako diagnostikoaren alde agertu da EAJ, baina era berean, neurri zehatzak beharrezkoak direla adierazi du alderdiak. Udal gobernuak herriko etxebizitzaren egoeraren inguruko dokumentu bat aurkeztu du, eta alderdi jeltzaleak bere ekarpenak egin dituela iragarri du.
Ekarpenetan, proposamen zehatzak aurkeztu dituzte. Honakoak:
-
Gazteentzako udal laguntzak berehala martxan jartzea, aurrekontuan jasota dauden arren oraindik garatu ez direnak, alokairua eta emantzipazioa errazteko.
-
Etxebizitzen birgaitzea sustatzea, auzokide eta komunitateei Eusko Jaurlaritzaren laguntzak eskuratzen lagunduz, eraikinen irisgarritasuna, energia- eraginkortasuna eta kontserbazioa hobetzeko.
-
Etxebizitza hutsak merkatura ateratzea, benetako egoera aztertuz eta jabeak alokairura bideratzeko programak abian jarriz.
-
Alokairu eskuragarria sustatzea, jabeei pizgarriak eskainiz eta dagoeneko martxan dauden programetan oinarrituz, bereziki gazteei zuzenduta.
-
Udal etxebizitza zerbitzu bat sortzea, herritarrei informazioa, aholkularitza eta laguntza eskainiko diena laguntzak eta programak eskuratzeko, askotan aukerak galtzen direlako informazio faltagatik edo izapideak zailak direlako.
Jeltzaleek adierazi dute egindako proposamenak Eusko Jaurlaritzako etxebizitza sailak gauzatzen dituen lanen barnean kokatzen direla. “Etxebizitza eskuratzeko aukera hobetzeko neurri berriak bultzatzen ari dira, hala nola Etxebizitza Legearen garapena, tentsio handiko eremu izendatutako udalerrien zabalkuntza eta herritarrei zuzendutako laguntza eta prestazioen indartzea. Funtsezkoa da Hondarribia politika horiekin lerrokatzea eta eskuragarri dauden tresna guztiak aprobetxatzea”, gehitu du EAJk.
Hondarribiko etxebizitza aferaren etorkizuna oso lotuta dago aurten onartuko den HAPOarekin. Baina HAPOa onartu arte, konponbideak beharrezkoak direla uste dute EAJko kideek. “HAPOaren prozesuan egindako aldaketa esanguratsuek eta izapidetze moduak ziurgabetasun juridikoa sortzen dute, eta horrek zuhurtziaz jokatzera behartzen du epe laburreko etxebizitza berrien aurreikuspenetan”.
