EH Bilduk udalaren kontratazio publikoko berdintasun klausularen gaineko kezka azaldu du
Udalaren emaitza kaskarrak direla eta EH Bilduk kezka azaldu du, eta 2019tik %13ak soilik aurreikusi ditu berdintasun-klausulak.
Elhuyarrek egindako txostenean, Irungo Udalak kontratazio prozesu eta dirulaguntzen deialdietan genero ikuspegia nola txertatu duen aztertu dute. Txostenaren “emaitza kaskarren” aurrean, EH Bilduk emandako erantzunarekin kezka azaldu du. 2019tik Irungo Udaleko kontratu publikoen %13ak soilik aurreikusi ditu berdintasun-klausulak. “Udalak euskal legea bete eta bere sailen arteko elkarlan bat abiatzeaz gain, egoera honetara zergatik iritsi garen aztertu behar du”.
“Legeak genero-ikuspegia kontratazio publikoan txertatzea aurreikusten du”, adierazi du Oihana Brionesek, EH Bilduko bozeramaileak. Udalak astelehenean neurri estrategiko gisa udal langileentzako gida teknikoa prestatu zuen, irizpideak sistematizatu eta euren klausulak txertatu ditzaten. Neurri horrek ez duela bere horretan egoera bideratzen salatu dute, eta konpromiso politiko handiagoa exijitu dute. Neurrien artean, 9 urtez deitu gabe egon den sailen arteko batzordea aktibatzea eskatu du EH Bilduk. “%13a datu orokorra da, arlo batzuetam kontratazioen %2an soilik aurreikusi dira berdintasun klausulak”. Hori dela eta, udal gobernuaren inplikazio politikoa bestelakoa izan behar duela adierazi dute, “udaleko arlo guztiak interpelatu behar dira”.
