Bilbon ezustekoa ematen saiatuko da Biok Txingudi
Biok Txingudik Uni Bilbo B taldearen aurkako lehia izango du bihar, hilak 18, 18:00etatik aurrera; garaipena zaila den arren, ez dute etsiko.
Txingudi Errugbi Taldeak partidaz beteriko asteburua izango du, denboraldiaren azken txanpan. Biok Txingudik etxetik kanpo jokatuko du bihar, hilak 18, 18:00etan. Hain zuzen, Bilbon ariko dira Uni Bilbo B-ren aurka. Bizkaitarrek denboraldi ona egin dute, eta Txingudiko emakumeak garaipena eskuratzen ahaleginduko dira, ezusteko garaipena izango litzateke. Aurreko partidetako jokoak konfidantza eman die jokalariei eta prest daude ezustekoa emateko.
Bilbokoaz gain, Txingudi/Baztan/Orereta 16 urtez azpiko taldeak Iruñean jokatuko du, La Unicaren aurka. Biharko partida 10:30ean hasiko da, eta sailkapeneko laugarrenen artean sailkatzen saiatuko dira. Bigarren faserako sailkapena zaila izango dute, egun sailkapeneko seigarrenak baitira.
Biok Experiential Shopping Txingudi Badia txapelketak laugarren edizio arrakastatsua izan zuen. Stadium Gal eta Plaiaundiko egoitzetan bildu ziren hirurehun gazte inguruk maila handiko errugbiaz gozatu ahal izan zuten jardunaldian zehar.
