Bidasoa, Aste Santuko kultura-turismoaren erreferente
Bidasoa Bizirik-ek turismoaren sektoreak Aste Santuan izan dituen datuak argitaratu ditu, emaitzak oso positiboak izan dira.
Bidasoa 2026ko Aste Santuko helmuga turistikoa bihurtu da beste urte batez. Bidasoa Bizirik-ek turismoak izan dituen datuak argitaratu berri ditu, eta bi asteetako datuek berretsi dute bisitarien kopuru orokorra egonkor mantendu dela. Erakundeak azpimarratu nahi du Irungo turismo bulegoan izandako hazkundea, iazko oparraldiarekin konparatuta, bulegoan egindako kontsultak bikoiztu egin dira, 58tik 115ra igo dira. Irungo bisitarien artean, gehiengoa estatu mailakoa da (%32,17), eta atzerriko turismoaren artean, Frantziatik eta AEBetatik datozenak nabarmentzen dira.
Bestalde, Hondarribiak ere datu esanguratsuak lortu ditu. Eskualdeko hotelen okupazioa %84,89koa izan da, eta Hondarribiaren kasuan, %88,46koa. Arma plazako eta Portuko turismo informazio guneek eskari sendoa mantendu dute. Datuek baieztatzen dute eskualdea turismo helmuga erreferente gisa sendotzen ari dela, bereziki kultura eta ondare arloan.
“Bidasoaldea helmuga erakargarri gisa kokatzen jarraitzen du, eskaintza kultural sendo eta anitzarekin. Aste Santuko turismoak tokiko ekonomia dinamizatzeaz gain, gure nortasuna indartzen du lurralde abegikor eta kulturalki aktibo gisa”, adierazi du Nuria Alzaga Bidasoa Bizirik-eko presidenteak. Estitxu Urtizbereak, presidenteordeak, Hondarribian bizi direnen eta bisitarien arteko oreka aurkitzea “funtsezkoa” dela dio. “Turismoaren hazkundeak ez dezala bertakoen bizi-kalitatea kaltetu, eta aldi berean, bisitariei esperientzia benetako eta aberasgarria eskaini nahi diegu”.
Bidasoa Bizirik-ek Helmuga Turistiko Adimendun (HTA) bereizgarria jaso du. “Azken urteotan, Bidasoaldea Helmuga Turistiko Adimendun gisa sendotu da, jasangarritasunarekin eta irisgarritasunarekin konprometituta, garapen orekatu eta arduratsua sustatzeko”. Honako enpresa hauek hpbekuntzarekin duten konpromisoagatik Kode Etikoaren bereizgarria jaso dute: Bidasoa Bizirik Turismo saila, Aitana hotela, Atalaia hotela, ETH hotela, Jauregi hotela, Jolaski SM, Oiasso museoa, Navegavela, Pension Europa eta Atalaia jatetxea. “Aitortza honek balioa ematen dio lurraldetik egiten ari garen lan bateratuari”, goraipatu du Alzagak.
