Mendeluenea: Stanley zaharra, auzotarrentzat
Hiru solairuko espazioa ireki berri dute. Larunbatean egingo da inaugurazioa, eta auzotarrak eta herritarrak gonbidatu dituzte bertara, 12:00etan.
Mendeluko bizilagunek urteak daramatzate merezi duten aitortza eskatzen. Mendelu ere Hondarribia da bandera eta kartelak ugariak dira auzoko leihoetan, eta hori bera borrokatzen jarraitzen dute. Horren harira, udalak adierazi du aurrera pauso bat eman dutela. “2023an erosi genuen bere garaian Stanley eraikina zena. Eraikina hobetu egin behar zen, zerbitzu publikora eskaintzeko. Orain, Mendeluenea eraikina estreinatzeko aukera dugu”, esan du Igor Enparan alkateak. Inaugurazio ofiziala larunbatean egingo dute, 12:00etan, eta auzoko eta herri osoko bizilagunak gonbidatu dituzte bertara.
Enparanen ustez, oso garrantzitsua da herritarrek zerbitzu publikoak gertu edukitzea, eta Mendeluren kasuan, erdigunetik urrun egonez, ez da prozedura erraza bizilagunentzat. “Besteak beste, makina bat ezarri dugu Mendeluenean, auzotarrek haien izapideak bertan egin ahal ditzaten”, esan du alkateak. Hala nola errolda izapideak edota sarrera elektronikoak bertatik egin ahalko dira. “Erabilera anitza izango du Mendelueneak. Urtarrilean ireki genuen Open gela edo auzo bulegoa, auzo honetan ditugun hirigintza gabeziei erantzuna emateko xedearekin. Hirigintza afera lantzeko, arkitekto bat izango da bertan lanean. Administrazio publikoan aditua den beste pertsona bat izango da bertan ere”. Bilera gelak baditu espazioak, eta horrez gain herriko eragileei irekitzeko lekuak aurreikusi dituzte.
Irisgarritasuna bermatzen duen eraikina da Mendeluenea, egindako obrak direla eta. “Igogailua eraiki da, eta eskailerak berritu”, azaldu du Estitxu Urtizberea Hirigintza zinegotziak. Elkarteei begira espazio egokia dela uste du zinegotziak, eta jakinda geroz eta eragile gehiago daudela herrian, lehiaketa bidez egingo da prozesua. “Hainbat udal ekipamendu irekiko ditugu datozen asteetan, eta beraz, prozesuak zentzuz egin behar ditugu. Garaituz programa ere bertan izango dugu. Indarkeria matxista jorratzen duen programa da, eta hirugarren solairuan haien artatze gunea izango dute”, esan du Urtizbereak.
Deszentralizazioa
Auzobihotza izango da Mendelu. “HAPOaren barnean, Auzobihotz izendatuko dugu eremu hau. Hondarribiak zerbitzuak oso zentralizatuak ditu, eta hori bera deszentralizatzeko egitasmoa da Auzobihotzak. Batzuetan badirudi Mendelu eta Amuteko zubia fisikoa izatez gain, benetako muga bat dela”, gehitu du zinegotziak. Horregatik, auzotarrentzat Mendeluenea erreferentziazko toki bat izatea nahi dute.
