Meaka konpainiak mendi martxa antolatuko du
Bigarren edizioa apirilaren 26an antolatuko dute, auzoa ezagutzeko bi ibilbide egingo dituzte: ibilbide luzea eta ibilbide laburra.
Bigarren urtez jarraian, Meaka konpainiak mendi martxa antolatuko du. Apirilaren 26an egingo dute Meaka auzoan barrena, eta iaz egin bezala, bi ibilbide antolatuko dituzte. Mendi martxa herritar guztientzat irekia izango da, eta bizilagun guztiak animatu nahi dituzte parte hartzera.
10:00etan, ibilbide luzeari ekingo diote eta 7 kilometroko distantzia egin beharko dute, desnibel handiarekin. Ordu erdi beranduago, 10:30ean, ibilbide laburra hasiko dute, errazagoa izango da eta desnibel gutxiagoko 3,5 kilometroko ibilbidea egin beharko dute. Meakako auzo elkartean hasiko dute jardunaldia, eta ibilbideak bukatu ostean, pintxo-potea antolatuko dute bizilagunentzat elkartean, bertan.
Mendi martxak kirola sustatzeaz gain, konpainiaren giro ona sustatzea eta meakarren arteko loturak indartzea ditu helburu, beti ere, ingurune hurbil eta parte-hartzailean.
