Miguel Mihuraren omenezko antzerkia estreinatuko dute igandean
Dramaturgoaren bizitza kontatzen duen antzezlana Itsas Etxean emango dute, eta horrez gain, liburutegian erakusketa bat ireki dute.
Igandean, apirilaren 19an, Mihura el ultimo comediografo antzezlana estreinatuko da Hondarribian, zehazki, Itsas Etxea Auditoriumean. Miguel Mihura dramaturgoaren omenean egindako lana da, XX. mendean antzerkian umorea berritu zuen egileari zuzendua. Adrian Perea eta Beatriz Jaenek zuzendu dute pieza.
“Zuzendutako lan honek Mihuraren bizitza eta obra modu originalean jorratzen ditu, biografia, fikzioa eta autofikzioa uztartzen dituen egituraren bidez”, azaldu du Hondarribiko Udalak. Horrez gain, Perearen ibilbidea nabarmendu nahi izan dute: “Egungo antzerki-eszenako sortzaile berritzaileetako batek, iraganaren eta orainaren arteko elkarrizketa sortzen duen kontakizun eszenikoa eraikitzen du, idazketa erresistentzia-modu gisa ulertuz eta barrearen ofizioa ikuspegi garaikide batetik aztertuz”.
Mihuraren bizitzako hainbat pasarte jorratzen dira antzezlanean, hala nola desilusioak, porrotak eta aitortza beratiarrak besteak beste. Bereziki Tres sombreros de copa lana egin zuenekoa kontatze da. “Muntaiak denbora-plano ezberdinak uztartzen ditu, egilea eta pertsonaia historikoa lotuz, eta umore absurdoa ikuspegi garaikide batetik berrirakurtzen du”, azaldu du udalak.
Erakusketa, ere
Estreinaldiaren harira, Hondarribiko Udaleko Kultura arloak, Udal Liburutegiarekin lankidetzan, egileari eskainitako erakusketa osagarri bat antolatu du. “Erakusketak Mihuraren bizitzari eta lanari lotutako oroitzapen pertsonalak, dokumentuak eta bestelako materialak biltzen ditu, baita Hondarribian igarotako denboraldi luzeei buruzko erreferentziak ere, herriarekin izan zuen lotura estua agerian utziz”. Erakusketako piezak Iñigo eta Jose Cruz Ruiz Villandiego anaiek utzi dituzte.
